22-sentabr — Butunjahon avtomobilsiz harakatlanish kunida Toshkent shahrida Yevropa Ittifoqining O‘zbekistondagi delegatsiyasi ijtimoiy san’atning yangi yirik asari bo‘lgan “Barqaror harakatlanish murali” taqdimotini o‘tkazdi.
Taqdimot Yevropa harakatlanish haftasi doirasida tashkil etilgan mobillik bo‘yicha bir qator tadbirlardan biri bo‘lib, u shaharda barqaror harakatlanish va yaxshiroq shahar muhiti yo‘lida sog‘lom turmush tarzini olib borishga qaratilgan. Yevropa harakatlanish haftaligi O‘zbekistonda to‘rtinchi marotaba o‘tkazilmoqda.
“Barqaror harakatlanish murali” Toshkent shahri Yangihayot va Sergeli tumanlari chegarasidagi “4-bekat” metro bekati qarshisida joylashgan to‘qqiz qavatli turar-joy binosining bir tomoniga chizilgan. Mural Autograph Art Gallery san’at galereyasi tomonidan tashkil qilingan va o‘zbekistonlik yosh rassomlar guruhi bo‘lgan Brushers ijodiy jamoasi tomonidan chizilgan.
“Ushbu devoriy surat yanada barqaror, faol va sog‘lom Toshkent haqida badiiy tasavvurni taqdim etib, Yevropa harakatlanish haftasining asosiy g‘oyasini o‘zida aks ettiradi”, — deyiladi xabarda.
Bu yil Yevropa harakatlanish haftasi O‘zbekistondagi hamkorlar va ishtirokchilar tomonidan yanada ko‘proq qo‘llab-quvvatlanmoqda, shu sabab biz mobillik bo‘yicha tadbirlar sonini oshirdik. Hamkorlar bilan birgalikda shaharda barqaror harakatlanishga rag‘batlantiradigan yirik jamoat san’at asari ishlab chiqilgani va tashabbus amalga oshirilganidan xursandmiz. Umid qilamanki, bu ajoyib mural toshkentliklarni kundalik hayotlarida imkon qadar yashil transport yechimlaridan foydalanishga undaydi, — deydi Sharlotta Adrian xonim, Yevropa Ittifoqining O‘zbekistondagi elchisi.Barqaror shaharda harakatlanish haqidagi xabarni yetkazuvchi ushbu jonli mural yangi tashkil etilgan Yangihayot tumanimizga ajoyib qo‘shimcha bo‘ldi. Bizning hokimligimiz Yangihayotni yanada yashil va yashash uchun qulay joyga aylantirish uchun aholimizning mahalliy barqaror harakatlanishini yaxshilash ustida ishlamoqda, — degan Toshkent shahar Yangihayot tumani hokimi Hayot Inog‘omov.
Devoriy surat taqdimotidan so‘ng, Sergeli tumani hokimligi ko‘magida “Velosipedda avtomobilsiz kun” tadbirini tashkil etiladi. Velo-yo‘nalish “Yangi Sergeli” istirohat bog‘idan boshlanib, Shokirariq ko‘chasidan o‘tib, Mirzo Tursunzoda ko‘chasiga burilib, yangi muralgacha masofani qamrab oladi. Velopoyga ishtirokchilari marraga yetib kelish uchun xuddi shu yo‘nalish bo‘ylab “Yangi Sergeli” istirohat bog‘iga qaytadi. Velopoyga davomida ushbu yo‘nalish avtomobillar uchun qisman yopiladi.
Velosipedchilarni, barcha mehmonlarni va tashrif buyurganlarni Sergeli tumanida, ayniqsa, yangilangan istirohat bog‘ida kutib olishdan mamnunmiz. Umid qilamanki, ushbu tadbir aholimizning e’tiborini velosipeddan foydalanishga va boshqa ekologik toza harakatlanish usullariga qaratadi. Tumanimiz O‘zbekistondagi Yevropa harakatlanish haftasining hamkori bo‘lgani juda ajoyib, — deydi Toshkent shahar Sergeli tumani hokimi Elbek Shukurov.Yevropa harakatlanish haftasi uchun mobillik tadbirlari 25-sentabrgacha davom etadi. Shu kunlari Yoshlar ishlari agentligi “Mahallalar Yevropa harakatlanish haftasi tarafdori” tadbirini o‘tkazadi, Tashkent Runners klubi a’zolari esa “Shaharlar atrof-muhitini yaxshilash uchun plogging” tadbirida ishtirok etib, Toshkent viloyatida yugurish chog‘ida chiqindilarni ham yig‘ishtiradi.
Yevropa harakatlanish haftasi
O‘zbekistonda Yevropa harakatlanish haftasi Yevropa Komissiyasining tashabbusi bilan har yili 50 dan ortiq mamlakatlarda o‘tkaziladigan global kampaniyaning bir qismidir. 2019, 2020 va 2021-yillarda muvaffaqiyatli o‘tkazilgan Yevropa harakatlanish haftaliklaridan so‘ng bu yilgi kampaniya O‘zbekistonda to‘rtinchi marta o‘tkazilmoqda.Havoning CO2 (karbon dioksidi) va issiqxona gazlari chiqindilari bilan ifloslanishi ekologik muammolar va iqlim o‘zgarishining asosiy sabablaridan biridir. Parij kelishuviga qo‘shilish va 2030-yilgacha issiqxona gazlari chiqindilarini 35 foizga kamaytirish majburiyatini olgan holda O‘zbekiston allaqachon iqlim o‘zgarishi va uning salbiy oqibatlariga qarshi kurashish yo‘liga o‘tdi. Shuningdek, O‘zbekiston Markaziy Osiyo davlatlari orasida birinchi bo‘lib Yevropa harakatlanish haftasi xabarini targ‘ib qilishga qo‘shildi. Ushbu tushunchani yanada mustahkamlash maqsadida O‘zbekiston Vazirlar Mahkamasi 2020-yilda Yevropa harakatlanish haftasini har yili milliy ahamiyatga ega bo‘lgan kampaniya sifatida e’tirof etdi.
Yevropa harakatlanish haftasi, shuningdek, iqlim va atrof-muhit muammolarini hal qilishga qaratilgan Yevropa Ittifoqining iqlim diplomatiyasining bir qismidir. 2022-yilda asosiy e’tibor energiyani tejash, energiya samaradorligi va qayta tiklanadigan energiya manbalarini jadallashtirishga qaratilgan bo‘lib, joriy energetika inqirozini hal qilish, yashil iqtisodiyotga o‘tishni tezlashtirish va energiya xavfsizligi darajasini ko‘tarish eng samarali usullari hisoblanadi.
Izoh (0)