Toshkentning Mirzo Ulug‘bek tumanidagi maktabda darsliklar ijarasiga yig‘ilgan pullar ota-onalarga qaytarildi. Bu haqda Toshkent shahar xalq ta’limi bosh boshqarmasi matbuot xizmati xabar berdi.
Ma’lum qilinishicha, tumandagi 71-sonli umumta’lim maktabining 5-sinf ota-onalari tomonidan kitob ijarasiga pul yig‘ilgani borasida ijtimoiy tarmoqda e’lon qilingan xabar Toshkent shahar xalq ta’limi ishchi guruhi tomonidan o‘rganildi.
Unga ko‘ra, pullar 2022/2023-o‘quv yilining boshida ota-onalar qo‘mitasi tomonidan kitob ijarasi bepul deb e’lon qilinishidan oldin yig‘ilgani aniqlandi. Yig‘ilgan mablag‘ ota-onalarga qaytarildi.
“Ta’lim muassasasida navbatdan tashqari o‘tkazilgan yig‘ilishda maktab sinf rahbarlari va ota-onalarga xalq ta’limi vazirining kitob ijaralari bekor bo‘lishi borasidagi ko‘rsatma xati asosida kitob ijarasi uchun pul yig‘ilmasligi, o‘quvchiga kitob ijaraga tekin berilishi tushuntirildi”, — deyiladi xabarda.
Maktab darsliklari va mashq daftarlarining ijara to‘lovlari miqdorlari keskin oshirilishi munosabati bilan keng jamoatchilik, ota-onalar tomonidan e’tirozlar bildirilgandi. Shundan so‘ng maktab darsliklarining ijara to‘lovlari doimiy ravishda bepul bo‘lishi e’lon qilindi. Buning mexanizmi ishlab chiqilishi bo‘yicha davlat rahbari tomonidan topshiriq olingan.
Mavzuga doir: “Kitoblarni pulli ijaraga berish konstitutsiyaga zid deb hisoblaymiz” — Rasul Kusherbayev
Izoh (0)