Ўзбекистонда кичик бизнес учун экспорт ва халқаро савдони ўқитиш дастури йўлга қўйилмоқда. 22 сентябрь куни Тошкент давлат иқтисодиёт университетида ушбу дастур тақдимоти бўлиб ўтди, деб хабар бермоқда «Дарё» мухбири.
Маълум бўлишича, дастур орқали тадбиркорлар халқаро савдо қоидалари, экспорт тартиб-қоидалари, транзит йўллари, сифат ва мувофиқлик стандартлари, шунингдек, Европа Иттифоқи бозорининг ўзига хос талаблари билан танишиб, малака оширишлари мумкин.
Тренинг дастурини Жаҳон Савдо Ташкилоти ва Бирлашган Миллатлар Ташкилотининг қўшма агентлиги бўлган Халқаро савдо маркази ишлаб чиққан. Дастур Ўзбекистон ва Марказий Осиёнинг бошқа мамлакатларидаги экспортчиларнинг ўзига хос муаммоларига қаратилган.
Ушбу курс орқали тадбиркорлар халқаро бозорга чиқиш қийин эмаслигини тушунади. Тўртта модулда тренерлар қандай ҳужжатлар талаб этилиши, жараёнлар ҳақида ўргатади. Бунинг учун тренерлар бир йил давомида ўқитилди. Асосий вазифа — вилоятларда ҳам ёш тадбиркорларда экспорт бўйича керакли кўникмаларни ҳосил қилиш, — дейди Иқтисод фанлари номзоди, доцент Нилуфар Исмоилова.Ўқув дастури кичик бизнес ва хусусий тадбиркорлик субъектларига амалий машғулотлар ва ҳаётий мисоллар орқали ўз маҳсулотларини минтақавий ва халқаро миқёсда экспорт қилишга яхшироқ тайёргарлик кўришда ёрдам бериши кутилмоқда.
Қайд этилишича, ўқув дастури Тошкент давлат иқтисодиёт университети томонидан онлайн ва офлайн шаклда амалга оширилади.
Изоҳ (0)