Ukrainadagi harbiy amaliyotda ishtirok etish uchun Grozniydan Donbassga yana bir ko‘ngillilar guruhi jo‘nab ketdi, deya ma’lum qildi Checheniston rahbari Ramzan Qodirov o‘zining Telegram kanalida.
“Ularning barchasi Gudermesdagi Rossiya maxsus kuchlari universitetida tayyorgarlik kurslaridan o‘tgan. Eng malakali instruktorlar rahbarligida ko‘ngillilar o‘zlarining taktik o‘q otish ko‘nikmalarini oshirgan va umuman olganda harbiy ishlarning asoslarini o‘zlashtirgan”, — deb yozadi Qodirov.
Uning ta’kidlashicha, Rossiyaning turli mintaqalaridan ko‘ngillilar har kuni Grozniyga kelmoqda va ularning soni kundan-kunga “to‘xtovsiz o‘sib bormoqda”.
“Donbassga navbatdagi ko‘ngillilar guruhini Checheniston ichki ishlar vaziri Ruslan Alxanov, bosh vazir o‘rinbosari Abusaid Vismurodov va ichki ishlar vaziri o‘rinbosari – Checheniston Ichki ishlar vazirligi politsiya boshlig‘i Aslan Irasxanov kuzatib bordi”, — deya qo‘shimcha qildi Checheniston rahbari.
15-sentabr kuni Qodirov Rossiya hududlari rasmiylariga Kremlning harbiy holat e’lon qilishini kutmasdan, 1000 nafar ko‘ngillini o‘zlari to‘plashni, ya’ni o‘z-o‘zini safarbar qilish deb ataluvchi harakatni amalga oshirishni taklif qilgandi. Qodirovning taklifini Qrim rahbari Sergey Aksyonov va Kursk gubernatori Roman Starovoyt qo‘llab-quvvatladi. Qrim ham, Checheniston ham Ukrainaga ko‘ngillilarni jo‘natgan.
Izoh (0)