Checheniston rahbari Ramzan Qodirov respublikaning Davlat dumasi deputati Adam Delimxanov boshchiligidagi “elita jangchilari” Ukrainada “oldingi frontga qaytgani”ni ma’lum qildi, deb yozadi Meduza.

“Elita jangchilari ukrainalik fashistlar tomonidan egallab olingan Mariupol, Severodonetsk, Lisichansk, Popasnoy va boshqa shaharlar ozod etilganidan keyin oliy bosh qo‘mondon tomonidan taqdim etilgan ta’tilga chiqqan edi, endi esa yangi kuch bilan oldingi frontga qaytdi. Yangi tajriba, toza qurol, to‘la o‘qdon va jangovar ruh bilan!” — deb yozdi Qodirov.

U o‘z obunachilaridan sabr qilishni va chechenistonlik jangchilardan “old frontdagi a’lo darajali natijalar”ni kutishni so‘radi.

Qodirov e’lon qilgan videoda Adam Delimxanov “Xerson, Zaporojye viloyatlarida, Donetsk xalq respublikasida” jami 10 ming nafar chechen harbiylari borligini aytgan.

Delimxanov ukrainalik harbiylarni “syurprizlarni kutib qolishga” chaqirdi va bu bilan Xarkov viloyatida Rossiya harbiylari chekinishi natijasida ukrainaliklar, go‘yoki, “[rossiyalik harbiylar uchun] ayni kerakli joyga kelgan”.

“Biz ko‘ryapmizki, ijtimoiy tarmoqlarda odamlar jangovar to‘qnashuvlar borayotgan turli viloyatlardagi pozitsiyalarda bugun nimalar yuz berayotganini tushunmayapti. Barcha rossiyaliklarni tashvish chekmaslikka ishontirmoqchiman: biz g‘alaba qilishimizga hech qanday shubha yo‘q”, — deyiladi Qodirovning xabarida.

Qodirovning bayonoti rossiyalik harbiylarning Xarkov viloyatidan chekinishi fonida yangradi. 11-sentabr kuni u tark etilgan shaharlarning barchasi “qaytarib olinishi”ni “rasman” ma’lum qildi. Shuningdek, Qodirov, agar “maxsus harbiy operatsiya”ni olib borish strategiyasi o‘zgartirilmasa, mudofaa vazirligi rahbariyatiga va mamlakat rahbariyatiga” vaziyatga oydinlik kiritishiga to‘g‘ri kelishini aytgandi.