Украинадаги ҳарбий амалиётда иштирок этиш учун Грознийдан Донбассга яна бир кўнгиллилар гуруҳи жўнаб кетди, дея маълум қилди Чеченистон раҳбари Рамзан Қодиров ўзининг Telegram каналида.
«Уларнинг барчаси Гудермесдаги Россия махсус кучлари университетида тайёргарлик курсларидан ўтган. Энг малакали инструкторлар раҳбарлигида кўнгиллилар ўзларининг тактик ўқ отиш кўникмаларини оширган ва умуман олганда ҳарбий ишларнинг асосларини ўзлаштирган», — деб ёзади Қодиров.
Унинг таъкидлашича, Россиянинг турли минтақаларидан кўнгиллилар ҳар куни Грознийга келмоқда ва уларнинг сони кундан-кунга «тўхтовсиз ўсиб бормоқда».
«Донбассга навбатдаги кўнгиллилар гуруҳини Чеченистон ички ишлар вазири Руслан Алханов, бош вазир ўринбосари Абусаид Висмуродов ва ички ишлар вазири ўринбосари – Чеченистон Ички ишлар вазирлиги полиция бошлиғи Аслан Ирасханов кузатиб борди», — дея қўшимча қилди Чеченистон раҳбари.
15 сентябрь куни Қодиров Россия ҳудудлари расмийларига Кремлнинг ҳарбий ҳолат эълон қилишини кутмасдан, 1000 нафар кўнгиллини ўзлари тўплашни, яъни ўз-ўзини сафарбар қилиш деб аталувчи ҳаракатни амалга оширишни таклиф қилганди. Қодировнинг таклифини Қрим раҳбари Сергей Аксёнов ва Курск губернатори Роман Старовойт қўллаб-қувватлади. Қрим ҳам, Чеченистон ҳам Украинага кўнгиллиларни жўнатган.
Изоҳ (0)