Lugansk Xalq Respublikasi jamoatchilik palatasi rahbari Aleksey Karyakin Rossiyaga qo‘shilish bo'yicha referendum haqida o‘z fikrlarini bildirdi. Bu haqda “RBK” xabar bermoqda. Avvalroq LXR jamoat palatasi Leonid Pasechnik va parlamentga LXRni Rossiya subyekti sifatida tan olish bo‘yicha zudlik bilan referendum o‘tkazish taklifi borasida murojaat qilgan edi.
“Bu bir kunda bitadigan ish emasligini yaxshi tushunasiz. Bugungi kunda hududlarda referendumni tashkil etish uchun barcha zarur ishlarni to‘liq hisoblab chiqish zarur, bunga jiddiy e’tibor qaratamiz. Afsuski, biz endigina ariza berdik, demak, sana haqida gapirishga hali erta”, — dedi Karyakin “Rossiya 24” telekanalining efirida.
Uning qayd etishicha, Jamoatchilik palatasi yaqin orada referendumning mumkin bo‘lgan shartlari bo‘yicha javob olishga umid qilmoqda.
Nafaqat Donbass respublikalari, balki Rossiya armiyasi tomonidan nazoratga olingan boshqa hududlarning ham Rossiya tarkibiga qo‘shilishi bo‘yicha referendumlar o‘tkazish g‘oyalari turfa darajalarda bir necha bor aytilgan va turli mumkin bo‘lgan sanalar taklif qilingan.
“RBK” 1-sentabr kungi manbalarga tayanib, Kreml Donbass, Xerson, Zaporojye va Xarkov viloyatlari respublikalarida kuz oxirigacha ovoz berish jarayonlari yakunlanishi haqida yozgan edi. “Ya’ni jarayon Rossiyada yagona ovoz berish kuni — 11-sentabrdan boshlanib, taxminan, 4-7-noyabrda tugashi ko‘zda tutilgan”, — deya ta’kidlagandi prezident ma’muriyatiga yaqin manbalardan biri.
Mavzuga doir:
Izoh (0)