Erdo‘g‘on Putinning nizoni tugatish niyatini ma’lum qildi va Ukrainaga yuzlandi

Rossiya prezidenti Vladimir Putin iloji boricha tezroq Ukrainadagi nizoni tugatmoqchi, jangovar harakatlar to‘xtatilishi uchun Kiyev Moskva bilan hamfikrlikka erishishi kerak. Bu haqda Turkiya prezidenti Rajab Toyyib Erdo‘g‘on PBS telekanaliga bergan intervyusida ma’lum qildi, deb yozadi “RBK”.

Erdo‘g‘onning aytishicha, u O‘zbekistonda SHHT sammiti doirasida Putin bilan har tomonlama muzokaralar o‘tkazgan va shu jarayonda uning intilishlarini tushunib yetgan. Uning aytishicha, tomonlar mahbuslarni ayirboshlash bo‘yicha bitimga erishgan, qishloq xo‘jalik mahsulotlarini bozorlarga chiqarish imkoniyatlari o‘rganilmoqda.

“Bu, albatta, yaxshi voqealar, lekin Ukraina Rossiya bilan hamfikr bo‘lishi kerak”, — deya ta’kidladi Turkiya prezidenti.

Jurnalist Erdo‘g‘onga respublikaning SHHTga a’zo bo‘lishni istashi haqidagi o‘zining gaplarini eslatdi va “Turkiya G‘arbning bir bo‘lagiga aylanmoqchimi yoki Sharqningmi?” — deb shunga aniqlik kiritishni so‘radi. Turkiya prezidenti bunga javoban, mamlakat G‘arbning ham, Sharqning ham emas,  balki “dunyoning bir bo‘lagi” ekanini aytdi. Bundan tashqari, deb davom etdi u, Yevroittifoq 52 yil davomida Turkiyani o‘z tarkibiga qo‘shishni “kechiktirib yurgan”, boshqa hech qaysi Yevropa davlati bunday vaziyatga tushmagan. Anqara kimga qo‘shilishni o‘zi tanlash huquqiga ega, dedi u.

“Biz bunday muzokaralarni olib borayotganimizda, Yevroittifoq qarshisida hisob berish niyatimiz bo‘lmaydi”, — deya ta’kidladi Erdo‘g‘on.

Uning qayd etishicha, Turkiya dunyoning barcha mamlakatlari bilan muloqotni yo‘lga qo‘ygan, Putin bilan, XXR rahbari Si Szinpin bilan, Hindiston bosh vaziri Narendra Modi bilan uchrashuvlar o‘tkazilmoqda, “chunki barchamiz — shu dunyoning bir bo‘lagimiz”.

Ukrainadagi ziddiyatni yakunlash haqida shunga o‘xshash bayonotni Rossiya prezidenti SHHT sammitida Hindiston bosh vaziri bilan suhbat chog‘ida aytib o‘tgan edi. Putin Ukrainadagi vaziyat yuzasidan Nyu-Dehlining pozitsiyasidan va “siz doim aytib keladigan xavotirlaringizdan” xabardorligini qayd etdi.

“Bularning barchasi iloji boricha tezroq tugashi uchun qo‘limizdan kelganini qilamiz. Afsuski, qarshi tomon, Ukraina rahbariyati muzokaralar jarayonidan bosh tortmoqda, o‘z maqsadlariga harbiy yo‘l bilan erishishini aytdi. Ular aytganidek, jang maydonida”, — dedi Putin.

Eslatib o‘tamiz, avgust boshida Erdo‘g‘on va Putin Sochida muzokaralar o‘tkazgan edi. CNN Turk ma’lumotlariga ko‘ra, ushbu uchrashuv davomida Rossiya prezidenti Zelenskiy bilan muzokaralar ehtimoli borligiga “ishora qilgan”.

Rossiya va Ukraina o‘rtasida harbiy nizolar boshlanganidan buyon Turkiya ular o‘rtasida vositachilik qilishga intilmoqda. Shu paytgacha Erdo‘g‘on o‘z mamlakatida Putin va Zelenskiy uchun sammit tashkillashtirishni ko‘p bora taklif qilgan. Shuningdek, uning vositachiligida jangovar harakatlar tufayli portlarda qolib ketgan donni Ukrainadan chiqarib ketish bo‘yicha bitim tuzilgan.