Butun dunyo ko‘mirga qaytayotgan bir paytda, O‘zbekiston ham ishlab chiqarishni oshirmoqda

Davlat statistika qo‘mitasi O‘zbekistonning 2022-yil yanvar—avgust oylariga ko‘ra sanoat ishlab chiqarishi haqida ma’lumot berdi.

Unga ko‘ra, yil boshidan beri O‘zbekistonda 3,4 mln tonna ko‘mir ishlab chiqarilgan. Birgina avgust oyining o‘zida bu ko‘rsatkich 480,3 ming tonnani tashkil qilgan va bu oshib bormoqda.

May oyida 67,1 ming tonna, 2022-yilning dastlabki 8 oyida 519,4 ming tonna neft ishlab chiqarilgan. O‘tgan yilning shu davriga nisbatan sohadagi ishlab chiqarish 0,1 ming tonnaga ko‘paygan.

Yanvar—avgust oylariga ko‘ra 34,6 mlrd kub metrdan oshiq tabiiy gaz, 864,8 ming tonna gaz kondensati ham ishlab chiqarilgan.

O‘tgan yilning shu davriga nisbatan ikkala sanoat sohasida ishlab chiqarish kamaygan — mos ravishda 452,5 mln kub metr va 24 ming tonnaga.

Dunyoda vaziyat qanday?

Ukrainadagi urush tufayli kuchaygan tabiiy gaz va neft taqchilligi mamlakatlarni yana eng iflos qazilma — ko‘mirga qaytishga majbur qilmoqda.

AQSH, Yevropa va Xitoy kabi dunyoning yirik iqtisodiyotga ega mamlakatlari iqlim o‘zgarishiga qarshi kurashish uchun ko‘mir iste’molini kamaytirish bo‘yicha qaror qabul qilgan edi.

Endilikda ushbu davlatlar yetarli miqdorda elektr energiyasini ta’minlash uchun qisqa muddatli ko‘mir xaridlarini ko‘paytirmoqda.

Yangi ko‘mir konlari va resurslariga investitsiyalar qisqarganidan keyin uni ishlab chiqarish va sotish bo‘yicha raqobat deyarli yo‘qolgan edi. Bu yil esa narxlar yangi rekord darajaga chiqmoqda.

Avvalroq yuqori harorat elektr taqchilligini keltirib chiqargani sabab Xitoy yana ko‘mirga qaytayotgani haqida xabar berilgandi.