Andijon viloyati adliya boshqarmasi tomonidan maktablarning birinchi sinf o‘quvchilariga prezident sovg‘asi sifatida tarqatilgan ryukzaklarni ishlab chiqarishda Gucci, Fila, Nike kabi xorij brendlardan foydalangan tadbirkorga ma’muriy bayonnoma rasmiylashtirildi, deya xabar berdi “Daryo” muxbiri.
Kun.uz internet nashrida e’lon qilingan “1-sinfga borgan ayrim qizaloqlarga qop-qora ryukzaklar berildi” sarlavhali materialda Andijon viloyatining bir nechta maktablarida birinchi sinf o‘quvchilariga prezident sovg‘asi sifatida tarqatilgan maktab ryukzaklarida Gucci, Fila, Nike kabi xorijiy brendlar logotipi tushirilgani qayd etilgan.
Ma’lum qilinishicha, ushbu holat yuzasidan Andijon viloyat adliya boshqarmasi Intellektual mulk huquqlarini himoya qilish bo‘limi tomonidan o‘rganish olib borilgan.
O‘rganish davomida Baliqchi tumanida faoliyat yurituvchi “H.P.S.” xususiy korxonasiga tegishli ishlab chiqarish obyektlarida 2022-yilning iyul-avgust oylari davomida davlat ro‘yxatidan o‘tkazilgan “Fila”, “Nike”, “Adidas”, “Gucci”, “Hello Kitty” xorijiy tovar belgilariga o‘xshash bo‘lgan “Fila”, “Nike”, “Adidas”, “Gucci”, “Hello Kitty” nomli o‘quvchilar ryukzaklarini ishlab chiqarganligi hamda “O‘quv ta’lim-ta’minot” davlat muassasasining shartnomasiga asosan Andijon viloyatidagi umumta’lim maktablarining 1-sinf o‘quvchilariga tarqatilganligi aniqlangan.
O‘zbekiston Respublikasida huquqiy muhofaza olgan tovar belgilariga adashtirib yuborish darajasida o‘xshash belgilardan foydalangan holatda mahsulotlarini ishlab chiqarishi va sotuvga taklif qilishi qonunga xilof hisoblanadi. “Tovar belgilari, xizmat ko‘rsatish belgilari va tovar kelib chiqqan joy nomlari to‘g‘risida”gi qonunining 3-, 26- va 27-moddalariga asosan tovar belgisiga doir mutlaq huquqni buzish deb e’tirof etilgan.
Holat yuzasidan xususiy korxonasiga nisbatan Andijon viloyati adliya boshqarmasi tomonidan o‘zganing tovar belgisi bo‘lgan va muhofaza qilinayotgan belgiga o‘xshash tovar belgilaridan noqonuniy foydalanganligi uchun ma’muriy bayonnoma rasmiylashtirilgan Shuningdek, Ma’muriy javobgarlik to‘g‘risidagi kodeksining 177-moddasiga asosan ko‘rib chiqish uchun sudga yuborilgan.
Izoh (0)