Prezident matbuot kotibi Sherzod Asadov bugun, 16-sentabr kunlari SHHTning Samarqand sammiti tadbirlari yakunlari bo‘yicha brifing o‘tkazdi. Bu haqda “Daryo” muxbiri xabar berdi.
Sherzod Asadov ishtirokchilar birin-ketin o‘z yurtlariga jo‘nab ketayotganini aytib o‘tdi.
Samarqand sammitida keng ko‘lamli masalalar muhokama qilingan hamda bir qator g‘oyatda ilg‘or qarorlar qabul qilinganini tahlil qilar ekanmiz, yangi fenomen - o‘ziga xos “SHHTning Samarqand jarayoni” kuzatilibdi, deb aytishimizga barcha asoslarimiz bor.Birinchidan, 44 ta hujjat imzolanib, Tashkilot tarixida rekord ko‘rsatkichga erishildi. Ular nafaqat SHHT faoliyatining hozirgi yo‘nalishlarini qamrab oladi, balki yangi format va mexanizmlarni boshlab beradi. Bu haqda gap borganda, transport va iqtisodiy o‘zaro bog‘liqlik, sanoat va texnologiyalar kooperatsiyasi, raqamli taraqqiyot va yashil energetika borasidagi konseptual dasturlarni qayd etish lozim.
Ikkinchidan, SHHT ishtirokchilari tarkibini ko‘paytirish bo‘yicha juda muhim qarorlar qabul qilindi. Eron a’zolik haqida tashkilot bilan memorandum imzoladi, Belarusni to‘laqonli a’zo sifatida qabul qilish jarayonini boshlashga qaror qilindi, beshta mamlakat - Bahrayn, Quvayt, Birlashgan Arab Amirliklari, Maldiv va Myanma muloqot bo‘yicha sherik maqomini oldi. Ya’ni, SHHT mintaqaviy tashkilotdan mintaqalararo hamkorlik platformasiga aylanish jarayoniga guvoh bo‘layapmiz va bu jahondagi mintaqalashuv tendensiyalarini yaqqol eks ettirmoqda.
Uchinchidan, tashkilotning 20 yildan oshiq tarixida birinch bor a’zo davlatlar rahbarlari SHHTni takomillashtirish va modernizatsiya qilishga qaratilgan tarixiy qarorni qabul qildilar. Ushbu yirik siyosiy qadam zamirida ishtirokchi mamlakatlarning SHHT faoliyati, maqsad va vazifalarini yangi voqelikka moslashtirishga intilishi yotadi. Bundan tashqari, ushbu qaror Tashkilot bir joyda to‘xtab qolmasligi, zamon bilan hamnafas bo‘lishi shart va u bunga qodir ekanidan dalolat beradi.
Shu bilan O‘zbekistonning SHHTga raisligi o‘z nihoyasiga yetdi va estafetani ilk bora Hindiston Respublikasi qabul qilib oldi. Biz Hindistonning tashkilotga raisligini muvaffaqiyatli o‘tishi tilaymiz”.
Prezident matbuot kotibi Sherzod Asadov
Izoh (0)