Андижонда хориж брендларидан фойдаланиб, рюкзак ишлаб чиқарган тадбиркорга маъмурий баённома расмийлаштирилди

Андижон вилояти адлия бошқармаси томонидан мактабларнинг биринчи синф ўқувчиларига президент совғаси сифатида тарқатилган рюкзакларни ишлаб чиқаришда Gucci, Fila, Nike каби хориж брендлардан фойдаланган тадбиркорга маъмурий баённома расмийлаштирилди, дея хабар берди «Дарё» мухбири.

Kun.uz интернет нашрида эълон қилинган «1-синфга борган айрим қизалоқларга қоп-қора рюкзаклар берилди» сарлавҳали материалда Андижон вилоятининг бир нечта мактабларида биринчи синф ўқувчиларига президент совғаси сифатида тарқатилган мактаб рюкзакларида Gucci, Fila, Nike каби хорижий брендлар логотипи туширилгани қайд этилган.

Маълум қилинишича, ушбу ҳолат юзасидан Андижон вилоят адлия бошқармаси Интеллектуал мулк ҳуқуқларини ҳимоя қилиш бўлими томонидан ўрганиш олиб борилган.

Ўрганиш давомида Балиқчи туманида фаолият юритувчи «H.P.S.» хусусий корхонасига тегишли ишлаб чиқариш объектларида 2022 йилнинг июль август ойлари давомида давлат рўйхатидан ўтказилган «Fila», «Nike», «Adidas», «Gucci», «Hello Kitty» хорижий товар белгиларига ўхшаш бўлган «Fila», «Nike», «Adidas», «Gucci», «Hello Kitty» номли ўқувчилар рюкзакларини ишлаб чиқарганлиги ҳамда «Ўқув таълим-таъминот» давлат муассасасининг шартномасига асосан Андижон вилоятидаги умумтаълим мактабларининг 1-синф ўқувчиларига тарқатилганлиги аниқланган.

Ўзбекистон Республикасида ҳуқуқий муҳофаза олган товар белгиларига адаштириб юбориш даражасида ўхшаш белгилардан фойдаланган ҳолатда маҳсулотларини ишлаб чиқариши ва сотувга таклиф қилиши қонунга хилоф ҳисобланади. «Товар белгилари, хизмат кўрсатиш белгилари ва товар келиб чиққан жой номлари тўғрисида»ги қонунининг 3-, 26- ва 27-моддаларига асосан товар белгисига доир мутлақ ҳуқуқни бузиш деб эътироф этилган.

Ҳолат юзасидан хусусий корхонасига нисбатан Андижон вилояти адлия бошқармаси томонидан ўзганинг товар белгиси бўлган ва муҳофаза қилинаётган белгига ўхшаш товар белгиларидан ноқонуний фойдаланганлиги учун маъмурий баённома расмийлаштирилган Шунингдек, Маъмурий жавобгарлик тўғрисидаги кодексининг 177-моддасига асосан кўриб чиқиш учун судга юборилган.