O‘zbekistonning Pekindagi elchixonasi, “O‘zcharmsanoat” uyushmasi, O‘zbekiston Savdo-sanoat palatasining Xitoydagi vakolatxonasi va Xitoy Xalqaro savdoni rivojlantirish kengashining Venchjou qo‘mitasi hamkorligida O‘zbekiston—Xitoy charm-poyabzal sanoati hamkorlik forumi bo‘lib o‘tdi. Bu haqda “Dunyo” axborot agentligi xabar qildi.
Qayd etilishicha, tadbirdan ko‘zlangan asosiy maqsad mamlakatda charm-poyabzal va mo‘ynachilik sohalarini har tomonlama rivojlantirish, sohaga zamonaviy bilim va texnologiyalarni keng jalb etish, mahsulotlar eksporti hajmini kengaytirishdan iborat.
Xitoyning 50 ga yaqin teri va charm-sanoat korxonalari vakillari ishtirok etgan ushbu anjumanda O‘zbekistonda bugungi kunda charm-sanoat va poyafzal ishlab chiqarish sohasini rivojlantirish bo‘yicha olib borilayotgan keng qamrovli islohotlar, investitsion salohiyat, eksport ko‘rsatkichlari to‘g‘risida taqdimot o‘tkazildi. Shuningdek, respublikada bu sohaga o‘z sarmoyasini kiritish niyatida bo‘lgan xorijiy sarmoyadorlarga yaratilgan sharoitlar, davlat tomonidan berilayotgan soliq, bojxona imtiyozlari haqidagi atroflicha ma’lumotlar ham tadbir qatnashchilarining e’tiboriga havola qilindi.
Xitoy Xalqaro savdoni rivojlantirish kengashi Venchjou qo‘mitasining prezidenti Cu Lishen Xitoy korxonalarining O‘zbekiston bozoriga qiziqishi katta ekanini, respublikada charm-sanoat sohasida olib borilayotgan islohotlar xitoylik mutaxasisslar tomonidan katta qiziqish bilan kuzatilayotganini qayd etdi.
“O‘zcharmsanoat” uyushmasi raisining o‘rinbosari Farhod Nurmuxamedov charm sanoati investitsiya va eksport salohiyati taqdimotini o‘tkazdi. U xitoylik hamkasblarini 12—14-oktabrda bo‘lib o‘tadigan UzCharmExpo-2022 xalqaro ko‘rgazmasiga taklif etdi. U, shuningdek, Xitoy korxonalari vakillarining O‘zbekistonda yangi sarmoyaviy loyihalarni amalga oshirishlariga ishonch bildirdi.
“Penshen” Industrial parki direktorining o‘rinbosari Van Fentay O‘zbekiston va Xitoy o‘rtasidagi hamkorlik mustahkam poydevorga ega bo‘lib, bugungi kunda yangi o‘suvchanlik bilan ravnaq topayotganini qayd etdi. U Xitoy ishbilarmon doiralari vakillarini O‘zbekistonda charm-sanoat sohasidagi o‘zaro hamkorlikni kuchaytirishga da’vat etdi.
Forum doirasida xitoylik tadbirkor va investorlar o‘zlarini qiziqtirgan barcha savollarga javob olishdi.
Izoh (0)