“Jahon siyosati va iqtisodiyoti barqaror bo‘lmagan hozirgi vaziyatda SHHTga katta ahamiyat qaratilmoqda” — ekspert Rustam Mahmudov

Jahon iqtisodiyoti va diplomatiya universiteti dotsenti Rustam Mahmudov “Daryo” muxbiriga bergan intervyusida SHHT sammitidan kutilayotgan asosiy yangiliklar haqida gapirib o‘tdi.

"SHHTdan kutilayotgan voqealar ko‘p. Jahon siyosati va iqtisodiyotida vaziyat o‘zgarmoqda. Ko‘plab risklar yuzaga kelmoqda. Bu risklar — sanksiyalar, savdo urushlari, eski mojarolarning qaytadan qo‘zg‘alishi. Tashqi muhit barqaror emas.

Shu bilan birga bu muhit yangi imkoniyatlar taqdim etadi. Bunday sharoitda SHHTga katta ahamiyat qaratilmoqda.

SHHT hozirda dunyoning eng yirik, rivojlangan iqtisodlarini o‘zida jamlagan. Bular Xitoy, Hindiston, Rossiya kabi mamlakatlar. Shuningdek, Markaziy Osiyo mamlakatlari, jumladan, O‘zbekiston iqtisodiyoti ham shiddat bilan rivojlanmoqda.

Shu sababli kutilayotgan asosiy narsa bu vaziyatda SHHTda yangi davr uchun yangi o‘yin qoidalarini shakllantirish mumkin yoki yo‘qligini aniqlab olishdan ibora. Umuman olganda, bunday taklif allaqachon berilmoqda.

Bu taklif SHHT tashkiloti ruhi asosida shakllantirilgan. Bunda ziddiyatga kirishmaslik, o‘zaro do‘stlik aloqalarini mustahkamlash, har qanday muammoni muzokaralar yo‘li bilan hal qilish kabi falsafalar birinchi planga chiqarilgan. Bu prinsiplar amalga oshsa, yangi xalqaro reallikning chizgilari shakllanayotganini ko‘rishimiz mumkin bo‘ladi. Shu sababli SHHT sammitidan kutilayotgan yangiliklar juda katta", — dedi Mahmudov.