Zaporojye atom elektr stansiyasi (ZAES) hududi demilitarizatsiya qilinishi va u yerdan qarama-qarshi kuchlarning barchasi olib chiqilishi kerak. BMT Bosh Assambleyasining 77-sessiyasi prezidenti Chaba Kreshi shunday murojaat bilan chiqdi.
“Zaporojye AES haqida gapirsak, bu yadro xavfsizligining jiddiy muammosi. Barcha tomonlardan so‘rashimiz mumkin bo‘lgan eng yaxshi chora — bu AESni demilitarizatsiya qilish, qo‘shinlarni olib chiqish va stansiya hududiga hech qanday harbiy operatsiya ta’sir qilmasligini ta’minlash, deb hisoblayman”, — dedi u.
Kereshining fikricha, bu qaror barcha davlatlar, jumladan, Rossiya va Ukraina uchun ham yaxshi variant bo‘ladi.
Ukrainaing Energodar shahrida joylashgan Zaporojye AES Rossiya qo‘shinlari nazorati ostida. So‘nggi paytlarda u doimiy ravishda o‘qqa tutilmoqda. Rossiya va Ukraina tomonlari hujumda bir-birini ayblamoqda.
Avvalroq Atom energiyasi bo‘yicha xalqaro agentlik (MAGATE) Ukrainaning yadroviy xavfsizligi to‘g‘risida 52 betli hisobot e’lon qilgan edi. Agentlik ZAESning o‘qqa tutilishi Ukraina uchun ham, qo‘shni davlatlar uchun ham misli ko‘rilmagan oqibatlarga olib kelishi mumkinligini ta’kidlab, zudlik bilan stansiya atrofida xavfsiz hudud yaratishga chaqirgan.
Hisobotda asosiy e’tibor o‘qqa tutishlar oqibatida stansiyaga yetkazilgan jismoniy zararga qaratilgan. Xususan, missiya ma’lumotlariga ko‘ra, yangi va ishlatilgan yadro yonilg‘isini saqlaydigan binolar, shuningdek, stansiyani jismonan himoya qilishga mo‘ljallangan avariya tizimi mavjud bino shikastlangan.
1-sentabr kuni MAGATE missiyasi Zaporojye AESga kelgan edi. Tashrif davomida agentlik inspektorlari stansiyadagi vayronagarchilikni baholashi, xavfsizlik tizimlarining qanday ishlashini aniqlashi, shuningdek, xodimlarning ish sharoitlari bilan tanishishi kerak edi. Guruh stansiyada taxminan to‘rt soat bo‘ldi, shundan so‘ng MAGATE bosh direktori Rafael Grossi boshchiligidagi ekspertlarning bir qismi AES hududini tark etdi. Hozir MAGATEning ikki xodimi ZAESda kuzatuvchi sifatida qolmoqda.
Izoh (0)