Checheniston rahbari Ramzan Qodirov Rossiya mintaqalari Ukrainadagi “maxsus operatsiya”da qatnashayotgan rossiyalik harbiylarga yordam berish uchun safarbarlik e’lon qilishi kerakligini aytdi, deb yozadi Meduza. Qodirovning videomurojaati uning Telegram-kanaliga joylandi.
“Maxsus operatsiyaga kelsak, bularning barchasi allaqachon jangovar harakatlarga aylanib ketgan. Mendan so‘rashganida, men harbiy holat e’lon qilgan bo‘lardim va bu manfurlarni tezroq bitirish uchun barcha imkoniyatlarni ishga solgan bo‘lardim… Agar kimdir istayotgan bo‘lsa, davlat rahbariyati safarbarlik e’lon qilishini kutish kerak emas, biz hammamiz safarbar bo‘lishimiz kerak, har bitta mintaqa o‘zida bor kuch va vositalarni, o‘zida bor imkoniyatlarni berishi kerak. Ular bugungi kunda harbiylarimizni nima bilan qo‘llab-quvvatlashi mumkin bo‘lsa, shuni taklif etishi kerak”, — dedi Qodirov.
Uning ma’lum qilishicha, Checheniston Ukrainaga qo‘shimcha to‘qqiz ming kishini yuborishga tayyor (u ularni “ko‘ngillilar” deb atadi). Hatto Rossiya “maxsus operatsiyasi” yakunlanganidan keyin ham, Checheniston bo‘linmalari Ukrainada urushni davom ettiradi, deya qo‘shib qo‘ydi u.
“Ukraina hududida bo‘lgan yoki hali shu yerda bo‘lib, endi jo‘nab ketadigan komandirlarimning barchasiga aytdimki, maxsus operatsiya tugasa ham, bizning bu shaytonlar bilan urushimiz tugamaydi. Biz ularni yo‘q qilishimiz kerak. Biz chekinish yoki yon bosish uchun ular bilan urush boshlamadim. Hatto halok bo‘lsak ham, g‘alaba qozonamiz — biz jannatga tushamiz. G‘olib bo‘lsak, jannatda yashaymiz, yerdagi jannatda”, — dedi Qodirov.
Rossiya qo‘shinlari Ukrainaning Xarkov viloyatida chekinganidan keyin Checheniston rahbari “xatoliklarga yo‘l qo‘yilgani”ni aytgandi. O‘zining yangi murojaatida u Ukraina G‘arbdan kutilganidan ko‘proq kuch va vositalar olganini, Rossiya harbiylari esa “qayerdadir kamchilikka yo‘l qo‘ygani”ni qayd etdi. Uning ta’kidlashicha, Checheniston bo‘linmalari urush boshida “Xerson, Xarkov viloyatlarini qo‘lga kiritgan” va Donetsk viloyatidagi Mariupolni egallagan.
Avvalroq KPRF (Rossiya Federatsiyasi Kommunistik partiyasi) yetakchisi Gennadiy Zyuganov Rossiya Davlat dumasi kuzgi sessiyasining birinchi yalpi majlisida nutq so‘zlab, Ukrainadagi “maxsus operatsiya” to‘la-to‘kis urushga aylanib ketganini ma’lum qilgan edi. KPRF yetakchisi qayd etishicha, Duma sessiyasi hali hech “bunday murakkab va keskin vaziyat”da ochilmagan. Uning so‘zlariga ko‘ra, Davlat dumasi ta’tilda o‘tkazgan ikki oy ichida vaziyat, shu jumladan, frontdagi holat ham “tubdan” o‘zgargan. “Lekin har qanday urush javobni talab qiladi. Avvalo, kuchlar va resurslar maksimal darajada safarbar etilishi kerak. Jamiyat jipslashishi va asosiy birlamchi vazifalar aniqlab olinishi kerak”, — deya qo‘shib qo‘ydi siyosatchi.
Avgust oxirida Ukraina Qurolli kuchlari Xerson viloyatida, sentabr boshida esa Xarkov viloyatida qarshi hujumga o‘tdi. Ikkinchi yo‘nalishda Ukraina harbiylari ikki hafta ichida ahamiyatli darajada muvaffaqiyatlarga erishdi, Rossiya esa urush boshidan buyon eng yirik mag‘lubiyatga uchradi.
Izoh (0)