Ozarbayjon harbiylari Rossiya Federal xavfsizlik xizmati binosi va avtomobilini o‘qqa tutdi, deb yozadi Meduza Armaniston Mudofaa vazirligi xabariga tayanib.
“15:00 holatiga (14-sentabr) Armaniston-Ozarbayjon chegarasidagi keskinlik yana o‘z cho‘qqisiga chiqdi. Butun chegara bo‘ylab dushman reaktiv artilleriyadan, shu jumladan, tinch aholi punktlariga qarata shiddatli otishmalarni qayta boshladi. Shunisi e’tiborni tortadiki, jangovar harakatlar hududida gumanitar missiyani amalga oshirayotgan Rossiya Federatsiyasi Federal xavfsizlik xizmati binosi va avtomobili kuchli artilleriya o‘qlari yomg‘iri ostida qoldi. Bu Ozarbayjon qurolli kuchlari o‘z nishonlarini ajrata olmasligidan darak beruvchi yana bir dalildir”, — deyiladi bayonotda.
“Infoteka24” Telegram-kanali zarar ko‘rgan avtomobil va vayron bo‘lgan bino suratlarini e’lon qildi. Biroq ushbu fotosuratlarga qarab ularning qayerda olinganini aniqlab bo‘lmaydi.
Armaniston OAVlari xabar berishicha, Armaniston sharqidagi Gegarkunik viloyati hududida Rossiya Federal xavfsizlik xizmati (FXX) chegara kuchlari joylashuv punkti o‘qqa tutilgan. Jurnalistlar ma’lumotlariga ko‘ra, hech kimga zarar yetmagan.
Rossiya FXX ma’lum qilishicha, 13 va 14-sentabr kunlari Armaniston-Ozarbayjon chegarasidagi hodisalarda FXX chegara boshqarmasi xodimlari jabrlanmagan.
Ozarbayjon vaziyat yuzasidan izoh berganicha yo‘q.
13-sentabrga o‘tar kechasi Armaniston-Ozarbayjon chegarasida jangivar harakatlar qayta boshlandi. Armaniston Mudofaa vazirligi 00:05 da Ozarbayjon armiyasi artilleriyadan arman pozitsiyalarini shiddatli ravishda o‘qqa tutishni boshlaganini ma’lum qildi. O‘z navbatida, Ozarbayjon Mudofaa vazirligi da’vo qilishicha, to‘qnashuvga Armaniston tomonidan “keng ko‘lamli provokatsiya” sabab bo‘lgan.
Izoh (0)