Buyuk Britaniya qirolichasi Yelizaveta II ning dafn marosimiga Rossiya, Belarus va Myanma davlatlari taklif etilmadi. Bu haqda Britaniya hukumati manbalariga tayanib, Meduza nashri xabar bermoqda.
Bundan tashqari, Erondan marosimda faqat elchi ishtirok etadi.
Sky News telekanalining ma’lum qilishicha, Rossiyaning Ukrainaga bostirib kirishi sababli uch davlat vakillari marosimga taklif etilmagan. Belarus Rossiyaning “maxsus operatsiyasini” qo‘llab-quvvatladi. Myanma qurolli kuchlari rahbari Ukrainada urush boshlanganidan keyin Rossiyaga keldi. AQSH razvedkasi ma’lumotlariga ko‘ra, Eron Ukrainadagi urush uchun dronlarni Rossiyaga topshirgan.
19-sentabr kuni Londonda Yelizaveta II ning dafn marosimida dunyoning turli davlatlaridan 500 ga yaqin yuqori martabali mehmonlar ishtirok etishi kutilmoqda.
Shu munosabat bilan Buyuk Britaniya diplomatik aloqalarni o‘rnatgan aksariyat davlat rahbarlariga taklifnomalar yubordi. AQSH, Kanada, Avstraliya, Yangi Zelandiya va boshqa ko‘plab davlatlar rahbarlari marosimda ishtirok etishlarini tasdiqladi.
OAV Yelizaveta II bilan bo‘lib o‘tadigan vidolashuv marosimini so‘nggi o‘n yillikdagi eng yirik diplomatik yig‘in deb atamoqda.
Mavzuga doir: Bayden va Shtaynmayer Yelizaveta II ning dafn marosimida ishtirok etadi
Izoh (0)