Ukraina prezidenti Vladimir Zelenskiyning aytishicha, sentabr oyi boshidan beri ukrainalik harbiylar mamlakat sharqi va janubida Rossiya ishg‘oli ostidagi olti ming kvadrat kilometrdan ortiq hududni ozod qilgan.
“Qo‘shinlarimiz harakati davom etmoqda”, — dedi Zelenskiy 12-sentabr kuni kechqurun e’lon qilingan videomurojaatida.
10-sentabr kuni Zelenskiy oy boshidan beri Ukraina armiyasi o‘z hududining qariyb ikki ming kvadrat kilometr qismini ozod qilgani haqida aytgandi, ertasi kuni esa Ukraina Qurolli kuchlari jami uch ming kvadrat kilometr hududni nazoratiga olganini e’lon qildi.
Avgust oyi oxirida Ukraina qurolli kuchlari Xerson viloyatiga, sentabr oyi boshida Xarkov viloyatiga qarshi hujum boshladi. Xarkov yo‘nalishidagi hujum urush boshidan beri eng muvaffaqiyatli bo‘ldi. Xarkov viloyati rahbari Oleg Sinegubov 11-sentabr kuni Ukraina harbiylari sentabr boshidan buyon mintaqadagi 40 dan ortiq shahar va qishloqlarni ozod qilganini aytdi.
Izoh (0)