Shimoliy Koreyada xususiy go‘zallik salonlari va sartaroshxonalar noqonuniy pul ishlash yo‘llaridan biri va “individualizm”ni targ‘ib qiluvchi deb hisoblanib, ommaviy ravishda yopilmoqda. Bu haqda Daily NK xabar bermoqda.
Ma’lum bo‘lishicha, bu harakat avgust oyining oxirlarida boshlangan.
Shimoliy Koreyada xususiy sartaroshlar va go‘zallik salonlari rasmiy davlat tashkilotlaridan farqli ravishda soliq to‘lamaydi. Soliqdan qochish istagi ko‘plab fuqarolarni noqonuniy sartaroshlik va go‘zallik salonlarini ochishga undadi. Bu esa ularga yaxshiroq pul topish imkoniyatini berdi.
Qayd etilishicha, bunday xususiy tashkilotlar mamlakat yoshlari orasida mashhur. Sababi u yerda yoshlar sochini xohlagan ko‘rinishda oldirish imkoniga ega. Biroq Shimoliy Koreyaning davlat sartaroshxonalarida mumkin bo‘lgan soch turmaklari qat’iy belgilangan.
Shu sababli u yerdan kamroq mijozlar, asosan, o‘rta yoshli odamlar foydalanadi. Shuningdek, kambag‘al qatlam uchun ham davlat sartaroshxonalari qulay. Chunki narxlar nisbatan arzon.
Avgust oyi oxirida Chongjin politsiyasi uylarda yoki ko‘chalarda soch olishga faol ravishda taqiq qo‘ya boshladi.
Hukumat odamlarni davlat sartaroshxonalaridan foydalanishga majburlab, xususiy sartaroshxonalarni yo‘q qilmoqda, bu yo‘l bilan aholidan davlat g‘aznasiga pul undirishga intilmoqda.
Xususan, shahar politsiyasi qoidani buzganlarga nisbatan 100 ming von jarima va qoidabuzarlik darajasiga qarab jinoiy jazo bilan tahdid qilmoqda.
Odamlar ochlikdan o‘layotgan bir paytda hukumat o‘zining ahmoqligini ko‘rsatib, endi odamlarning tirikchiligini ham olib qo‘yyapti. Tabiiyki, aholi bunga qarshi. Davlat xalqdan hech narsa so‘ramay, aksincha ular o‘zini o‘zi eplab yashayotganiga shukr qilishi kerak", - degan Daily NK nashrining nomi sir qolishini istagan manbasi.
Izoh (0)