Qozog‘iston prezidenti Qosim-Jo‘mart To‘qayev parlament deputatlarining mamlakat poytaxti nomini Nur-Sultondan Ostonaga qayta o‘zgartirish tashabbusini qo‘llab-quvvatladi, deb yozadi Meduza To‘qayevning matbuot kotibi Ruslan Jeldibayga tayanib.
“Prezident deputatlarning ushbu tashabbusidan xabardor, ular esa, o‘z navbatida, aholi bilan uchrashuvlarda aytilgan takliflarga, shuningdek, referendum chog‘ida fuqarolar tomonidan qilingan ko‘p sonli murojaatlarga tayangan. Parlament a’zolari takliflari davlat rahbarining roziligi bilan Konstitutsiyaviy qonun loyihasiga kiritildi”, — dedi prezident matbuot kotibi.
Uning qayd etishicha, To‘qayev “Nursulton Nazarboyevning Qozog‘iston zamonaviy davlatchiligi mustahkamlanishi va poytaxt tashkil topishidagi hal qiluvchi rolini tarixiy fakt deb hisoblaydi”. Prezidentning fikricha, deya qo‘shib qo‘ydi u, Nazarboyevning nomi berilgan boshqa obyektlar o‘z nomlarini saqlab qolishi kerak.
Qozog‘iston poytaxtining nomi 2019-yil martida, To‘qayev o‘z inauguratsiya nutqi chog‘ida tegishli taklifni ilgari surganidan keyin Ostonadan Nur-Sultonga o‘zgartirilgan edi.
Qozog‘iston poytaxti 1998-yildan buyon Ostona deb atalgan. Ungacha shahar 1992-yildan keyin Akmola deb nomlangan va o‘sha paytda poytaxt bo‘lmagan (Olmaota shahri shunday maqomga ega bo‘lgan). Akmola 1961-yildan 1992-yilga qadar Selinograd, undan ham avval esa Akmolinsk deb atalgan.
Nursulton Nazarboyev Qozog‘istonning birinchi prezidenti bo‘lib, bu lavozimni 1991-yil dekabridan 2019-yil martigacha egallab kelgan. Nazarboyevning davomchisi To‘qayev bo‘ldi. Nazarboyev, prezident lavozimidan ketib, Qozog‘iston Xavfsizlik kengashiga rahbarlik qilishda davom etdi, uning qarindoshlari esa rahbarlik lavozimlarini saqlab qoldi.
2022-yil yanvarida Qozog‘istonda gaz narxi oshishiga qarshi noroziliklar katta ko‘lamli tartibsizliklarga aylanib ketdi. Ularni bostirish uchun To‘qayev, xususan, KXShT mamlakatlari qurolli kuchlarini taklif qildi. Tartibsizliklar fonida Nazarboyev Xavfsizlik kengashi rahbari lavozimidan tushirildi, uning qarindoshlari esa davlat va tijorat tuzilmalaridagi lavozimlaridan ayrildi.
Izoh (0)