Britaniya Mudofaa vazirligining kunlik hisobotida yozilishicha, Rossiyaning Ukrainaga bostirib kirishi oqibatida Rossiya Federatsiyasi harbiy salohiyati zaiflashdi.
Hisobotda aytilishicha, Rossiyaning G‘arbiy harbiy okrugi tarkibiga kiruvchi Birinchi gvardiya tank armiyasi bosqinning dastlabki bosqichida katta yo‘qotishlarga uchragan va Ukraina qo‘shinlarining qarshi hujumiga qadar ham to‘liq tiklanmagan, oqibatda mazkur bo‘linma boshqa rus qo‘shinlari bilan birga Xarkov viloyatidan olib chiqilgan.
Birinchi gvardiya tank armiyasi Rossiya Qurolli Kuchlarining elita bo‘linmalaridan biri bo‘lib, uning vazifasi, xususan, Moskvani himoya qilish va NATO bilan urush bo‘lgan taqdirda qarshi hujumga o‘tishdir. Ukrainadagi urush ushbu armiyani ham, G‘arbiy harbiy okrugning boshqa bo‘linmalarini ham zaiflashtirgan. Shu sababdan Britaniya Mudofaa vazirligi hisob-kitoblariga ko‘ra, NATO bilan mojaro yuzaga kelgan taqdirda Rossiyaning alyansga qarshilik ko‘rsatish qobiliyati pasaygan. Harbiy salohiyatni tiklash yillab vaqt oladi, deyiladi hisobotda.
Avgust oyi oxirida Ukraina qurolli kuchlari Xerson viloyatiga, sentabr oyi boshida Xarkov viloyatiga hujum boshladi. Xarkov yo‘nalishidagi hujum urush boshidan beri eng muvaffaqiyatlisi bo‘ldi. Ukraina prezidenti Vladimir Zelenskiy 12-sentabr oqshomida Ukraina Qurolli kuchlari ikki haftadan kamroq vaqt ichida 6 ming kvadrat kilometr hudud ustidan nazoratni qayta tiklashga muvaffaq bo‘lganini ma’lum qildi.
Izoh (0)