Буюк Британия қироличаси Елизавета II нинг дафн маросимига Россия, Беларусь ва Мьянма давлатлари таклиф этилмади. Бу ҳақда Британия ҳукумати манбаларига таяниб, Meduza нашри хабар бермоқда.
Бундан ташқари, Эрондан маросимда фақат элчи иштирок этади.
Sky News телеканалининг маълум қилишича, Россиянинг Украинага бостириб кириши сабабли уч давлат вакиллари маросимга таклиф этилмаган. Беларусь Россиянинг «махсус операциясини» қўллаб-қувватлади. Мьянма қуролли кучлари раҳбари Украинада уруш бошланганидан кейин Россияга келди. АҚШ разведкаси маълумотларига кўра, Эрон Украинадаги уруш учун дронларни Россияга топширган.
19 сентябрь куни Лондонда Елизавета II нинг дафн маросимида дунёнинг турли давлатларидан 500 га яқин юқори мартабали меҳмонлар иштирок этиши кутилмоқда.
Шу муносабат билан Буюк Британия дипломатик алоқаларни ўрнатган аксарият давлат раҳбарларига таклифномалар юборди. АҚШ, Канада, Австралия, Янги Зеландия ва бошқа кўплаб давлатлар раҳбарлари маросимда иштирок этишларини тасдиқлади.
ОАВ Елизавета II билан бўлиб ўтадиган видолашув маросимини сўнгги ўн йилликдаги энг йирик дипломатик йиғин деб атамоқда.
Мавзуга доир: Байден ва Штайнмаер Елизавета II нинг дафн маросимида иштирок этади
Изоҳ (0)