Farg‘ona viloyati Qo‘qon shahri hokimligidan “Ko‘kalamzorlashtirish” mas’uliyati cheklangan jamiyati foydasiga 1,5 milliard so‘mga yaqin moddiy zarar undiriladigan bo‘ldi.
Qayd etilishicha, Qo‘qon shahri “Ko‘kalamzorlashtirish” mas’uliyati cheklangan jamiyati rahbari M.Mahkamova shahar adliya bo‘limiga murojaat qilgan. Unda aytilishicha, Qo‘qon shahri hokimining 2019-yil 2-oktabrdagi qarori bilan Furqat ko‘chasi 164-uyda joylashgan “Ko‘kalamzorlashtirish” jamiyatiga tegishli poyabzal sexi hamda issiqxona bino inshootlari buzdirilib, 3 ming 300 kvadrat yer maydoni shahar zaxirasiga olingan.
Biroq shu kunga qadar boshqa hududdan faqat 664 kvadrat yer maydoni berilib, qolgan 2 ming 636 kvadrat metr yer maydoni vaqtida ajratib berilmagan. Ana shu yer maydoni xususiy quruvchi tashkilotlarga ko‘p qavatli turar joylar qurish uchun ajratib berilgan. Jamiyatga kompensatsiya to‘lovlari to‘lab berilmagani va yer maydoni ajratib berish xususida qilingan murojaatlar qonuniy hal etilmayotgani oqibatida 20 nafar ishchi xodim ishsiz qolgan. Oqibatda “Ko‘kalamzorlashtirish” mas’uliyati cheklangan jamiyati 727 million 766 ming so‘m moddiy zarar ko‘rgan.
Jamiyat rahbari shahar adliya bo‘limiga murojaati davomida sudga da’vo arizasi bilan murojaat qilishga, ya’ni advokat xizmati hamda davlat boji to‘lash uchun hozirgi kunda imkoniyati yo‘qligini ko‘rsatib o‘tgan. Buzilgan huquqlari tiklanishi va yetkazilgan zararni undirilishida adliyadan amaliy yordam so‘ragan.
Qo‘qon shahri “Ko‘kalamzorlashtirish” MCHJning murojaati o‘rganilganda, haqiqatan ham, shahar hokimi qarori bilan MCHJga tegishli poyabzal sexi hamda issiqxona bino-inshootlari buzdirilgani aniqlandi. Mazkur holat yuzasidan shahar adliya bo‘limi tomonidan Iqtisodiy ishlar bo‘yicha Qo‘qon tumanlararo sudiga da’vo arizasi kiritildi. Iqtisodiy ishlar bo‘yicha O‘zbekiston tumanlararo sudining 11-avgustdagi hal qiluv qaroriga asosan “Ko‘kalamzorlashtirish” MCHJ foydasiga shahar hokimligidan 1 milliard 462 million 795 ming so‘m moddiy zarar undirilishi belgilandi.
Izoh (0)