Фарғона вилояти Қўқон шаҳри ҳокимлигидан «Кўкаламзорлаштириш» масъулияти чекланган жамияти фойдасига 1,5 миллиард сўмга яқин моддий зарар ундириладиган бўлди.
Қайд этилишича, Қўқон шаҳри «Кўкаламзорлаштириш» масъулияти чекланган жамияти раҳбари М.Маҳкамова шаҳар адлия бўлимига мурожаат қилган. Унда айтилишича, Қўқон шаҳри ҳокимининг 2019 йил 2 октябрдаги қарори билан Фурқат кўчаси 164-уйда жойлашган «Кўкаламзорлаштириш» жамиятига тегишли пойабзал цехи ҳамда иссиқхона бино иншоотлари буздирилиб, 3 минг 300 квадрат ер майдони шаҳар захирасига олинган.
Бироқ шу кунга қадар бошқа ҳудуддан фақат 664 квадрат ер майдони берилиб, қолган 2 минг 636 квадрат метр ер майдони вақтида ажратиб берилмаган. Ана шу ер майдони хусусий қурувчи ташкилотларга кўп қаватли турар жойлар қуриш учун ажратиб берилган. Жамиятга компенсация тўловлари тўлаб берилмагани ва ер майдони ажратиб бериш хусусида қилинган мурожаатлар қонуний ҳал этилмаётгани оқибатида 20 нафар ишчи ходим ишсиз қолган. Оқибатда «Кўкаламзорлаштириш» масъулияти чекланган жамияти 727 миллион 766 минг сўм моддий зарар кўрган.
Жамият раҳбари шаҳар адлия бўлимига мурожаати давомида судга даъво аризаси билан мурожаат қилишга, яъни адвокат хизмати ҳамда давлат божи тўлаш учун ҳозирги кунда имконияти йўқлигини кўрсатиб ўтган. Бузилган ҳуқуқлари тикланиши ва етказилган зарарни ундирилишида адлиядан амалий ёрдам сўраган.
Қўқон шаҳри «Кўкаламзорлаштириш» МЧЖнинг мурожаати ўрганилганда, ҳақиқатан ҳам, шаҳар ҳокими қарори билан МЧЖга тегишли пойабзал цехи ҳамда иссиқхона бино-иншоотлари буздирилгани аниқланди. Мазкур ҳолат юзасидан шаҳар адлия бўлими томонидан Иқтисодий ишлар бўйича Қўқон туманлараро судига даъво аризаси киритилди. Иқтисодий ишлар бўйича Ўзбекистон туманлараро судининг 11 августдаги ҳал қилув қарорига асосан «Кўкаламзорлаштириш» МЧЖ фойдасига шаҳар ҳокимлигидан 1 миллиард 462 миллион 795 минг сўм моддий зарар ундирилиши белгиланди.
Изоҳ (0)