Sirdaryo viloyatining Guliston va Farg‘ona viloyatining Rishton tumanlarida chet el valyutasining noqonuniy muomalaga kiritilishi oldi olindi. Bu haqda Iqtisodiy jinoyatlarga qarshi kurashish departamenti xabar qildi.
Qayd etilishicha, Bosh prokuratura huzuridagi departament hamda DXXning Guliston tumani bo‘limlari tomonidan tezkor tadbir o‘tkazilgan. Unda eski Guliston shahar markaziy dehqon bozori atrofida valyuta ayirboshlash bilan shug‘ullanib kelgan A.S. fuqaro J.ga 2 800 dollarni jami 30,9 million so‘mga sotgan vaqtda ushlangan. Jami 2 840 dollar, 8 200 rubl va 1,1 million so‘m ashyoviy dalil sifatida olingan.
Shuningdek, Rishton tuman bo‘limi tomonidan DXX xodimlari bilan hamkorlikda tezkor tadbir o‘tkazilgan. Unda tumandagi savdo markazi oldida valyuta ayirboshlash bilan shug‘ullanib kelgan F.O. fuqaro A.ga 3 300 dollarni 36,4 million so‘mga sotgan vaqtida ashyoviy dalillar bilan ushlangan.
Holatlar yuzasidan Jinoyat kodeksining 177-moddasi (valyuta qimmatliklarini qonunga xilof ravishda olish yoki o‘tkazish) bilan jinoyat ishlari qo‘zg‘atilgan. Hozirda tergov harakatlari o‘tkazilmoqda.
Izoh (0)