Сирдарё вилоятининг Гулистон ва Фарғона вилоятининг Риштон туманларида чет эл валютасининг ноқонуний муомалага киритилиши олди олинди. Бу ҳақда Иқтисодий жиноятларга қарши курашиш департаменти хабар қилди.
Қайд этилишича, Бош прокуратура ҳузуридаги департамент ҳамда ДХХнинг Гулистон тумани бўлимлари томонидан тезкор тадбир ўтказилган. Унда эски Гулистон шаҳар марказий деҳқон бозори атрофида валюта айирбошлаш билан шуғулланиб келган А.С. фуқаро Ж.га 2 800 долларни жами 30,9 миллион сўмга сотган вақтда ушланган. Жами 2 840 доллар, 8 200 рубль ва 1,1 миллион сўм ашёвий далил сифатида олинган.
Шунингдек, Риштон туман бўлими томонидан ДХХ ходимлари билан ҳамкорликда тезкор тадбир ўтказилган. Унда тумандаги савдо маркази олдида валюта айирбошлаш билан шуғулланиб келган Ф.О. фуқаро А.га 3 300 долларни 36,4 миллион сўмга сотган вақтида ашёвий далиллар билан ушланган.
Ҳолатлар юзасидан Жиноят кодексининг 177-моддаси (валюта қимматликларини қонунга хилоф равишда олиш ёки ўтказиш) билан жиноят ишлари қўзғатилган. Ҳозирда тергов ҳаракатлари ўтказилмоқда.
Изоҳ (0)