Ukraina prezidenti Vladimir Zelenskiy Liz Trass Buyuk Britaniya bosh vaziri lavozimida muloqot qilgan birinchi chet el yetakchisiga aylandi, deb yozadi Meduza.
“Bu Ukraina uchun katta sharaf”, — dedi Zelenskiy kechki murojaatida.
Trass Zelenskiyga u “to‘liq qo‘llab-quvvatlanishi”ni, Ukraina esa uzoq muddatli istiqbolda Buyuk Britaniyaning ko‘magiga umid qilishi mumkinligini tasdiqlagan, deyiladi Britaniya hukumati xabarida. Shuningdek, Trass Zelenskiyning Ukrainaga tashrif buyurish taklifini qabul qilgan.
Trassning chet el rahbarlari orasidagi ikkinchi suhbatdoshi AQSH prezidenti Jo Bayden bo‘ldi.
Liz Trass hukmron Konservativ partiya yetakchiligi uchun kurashda g‘olib chiqib, 6-sentabr kuni Buyuk Britaniyaning yangi bosh vaziriga aylandi. Undan avvalgi hukumat rahbari, partiya ichidagi kurashlar natijasida iste’foga chiqqan Boris Jonson jamoatchilik orasida Ukrainani qo‘llab-quvvatlovchi eng faol dunyo yetakchilaridan biri edi va u urush davrida Kiyevga bir necha marta borgan edi.
Iyul oxirida Britaniya tashqi ishlar vaziri lavozimida ishlab yurgan Liz Trass bosh vazir etib saylansa, u birinchi bo‘lib Ukraina prezidenti Vladimir Zelenskiyga qo‘ng‘iroq qilib, o‘z qo‘llab-quvvatlovini bildirishini ma’lum qilgan edi.
Izoh (0)