АҚШ Украина ва бутун дунё учун кутилмаган оқибатларга йўл қўймаслик учун Россияни терроризм ҳомийси бўлган давлат деб тан олиш ниятидан воз кечган. Бу ҳақда Оқ уй матбуот котиби Карин Жан-Пьер маълум қилди, деб ёзади «РБК».
Аввалроқ АҚШ президенти Жо Байден Россияни терроризм ҳомийси деб тан олиш керак деб ҳисоблаш-ҳисобламаслиги ҳақидаги саволга «йўқ» деб жавоб берганди. Оқ уй Байден бундай чорани қўлламасликка қарор қилганини тасдиқлади.
«Бу олға қадам ташлашнинг энг самарали ёки энг кучли йўли эмас», — деди Жан Пьер ва «бундай деб тан олиш Украина ва дунё учун кутилмаган оқибатларни келтириб чиқариши мумкин»лигини қўшиб қўйди.
Хусусан, бу гуманитар ёрдам етказиб беришга таъсир қилган, дон битимининг амалга оширилишини хавф остига қўйган, Украинани қўллаб-қувватлаш бўйича кўп томонлама ҳамкорликни сусайтирган ва АҚШнинг музокаралар жараёнларида Киевга ёрдам бериш имкониятларини йўққа чиқарган бўларди, деди Оқ уй вакили. Жан-Пьернинг сўзларига кўра, Россияни «жавобгарликка» даъват этиш учун АҚШ иқтисодий чоралардан фойдаланишда давом этади.
Россияни терроризм ҳомийси бўлган давлат деб тан олиш ғояси АҚШда апрелдаёқ пайдо бўлган, ўшанда Давлат департаменти шундай имкониятни кўриб чиқаётганини маълум қилганди. The Washington Post газетаси эса шундай илтимос билан Байденга Украина етакчиси Владимир Зеленский мурожаат қилганини ёзганди. Бунга жавобан Байден мазкур масалада аниқ баёнотлар бермаган ва расмий Москвага босим ўтказишнинг турли йўлларини кўриб чиқишга тайёрлигини таъкидлаган.
Politico маълумотларига кўра, Россияга шундай мақом берилишини АҚШ Конгресси Вакиллар палатаси спикери Нэнси Пелоси талаб қилиб туриб олган. Бироқ Давлат департаменти бунга қарши чиқди ва бу, хусусан, Украина донини Қора денгиз орқали экспорт қилиш ҳақидаги битимга путур етказади, деб ҳисоблади.
Москва Вашингтонни мамлакатга терроризм ҳомийси мақоми берилган тақдирда, бу икки томонлама алоқаларда «орқага қайтмаслик нуқтаси» юзага келишига сабабчи бўлиши ҳақида огоҳлантирди.
Украинада уруш бошланганидан кейин Литва ва Латвия парламентлари Россияни терроризмни қўллаб-қувватловчи мамлакат деб эълон қилганди.
Июль охирида АҚШ Сенати Давлат департаментини Чеченистон, Грузия, Сурия ва Украинадаги воқеалар муносабати билан Россияни терроризмнинг ҳомийси сифатида тан олишга чақирувчи резолюцияни қабул қилган эди.
Шу кунгача АҚШ терроризм ҳомийси сифатида тўртта давлатни тан олган: Сурия (1979 йил декабрда), Эрон (1984 йил январда), Шимолий Корея (2017 йил ноябрда) ва Куба (2021 йил январда).
Бошқа давлатнинг терроризм ҳомийси сифатида тан олиниши бу давлат билан ўзаро муносабатларни қаттиқ чеклаш, унга мудофаа товарларини экспорт қилишни тақиқлаш, икки мақсадли маҳсулотлар (ҳам фуқаролик маҳсулотлари, ҳам қурол яратишда ишлатиладиган) экспортини назорат қилиш, молиявий ва бошқа чекловларни назарда тутади. Давлат департаменти веб-сайтида айтилишича, қарор, шунингдек, «терроризмга ҳомийлик қилувчи давлатлар билан савдо қилган шахслар ва мамлакатларни жазолайдиган бошқа санкциялар тўғрисидаги қонунларни» киритишни ҳам назарда тутади. Бу шуни англатадики, АҚШ санкциялари иқтисодиётнинг айрим тармоқлари билан чекланиб қолмайди, дея таъкидлади Politico.
Изоҳ (0)