Myanmada Rossiyaning ham, boshqa har qanday davlatning ham harbiy bazalarini yaratish mumkin emas, chunki bu konstitutsiya tomonidan taqiqlangan. Bu haqda Myanma rahbari Min Aun Xlayn “RIA Novosti”ga bergan intervyusida aytib o‘tdi.
“Ha, xorijiy davlatning harbiy bazasini tashkil etishga ruxsat bera olmaymiz. Ammo Rossiya bizning do‘stimiz, mudofaa sohasida hamkorlikning boshqa shakllarini topishimiz mumkin”, — dedi u Rossiya Sharqiy iqtisodiy forumi chog‘ida.
Min Aun Xlayn mintaqadagi vaziyatni barqarorlashtirish uchun harbiy bazalardan tashqari hamkorlikning boshqa shakllari ham mavjudligiga ishora qildi.
Shuningdek, avgust oyi o‘rtalarida Serbiya prezidenti Aleksandr Vuchich mamlakat o‘z hududida harbiy bazalarga muhtoj emasligini aytgandi.
“Serbiyaning o‘zi mamlakat va xalqini himoya qiladi, ittifoq tuzadi va Rossiya, Amerika hamda Xitoy bilan yaxshi munosabatlardan uyalmaydi. Biz o‘zimizga o‘zimiz g‘amxo‘rlik qilamiz”, — degan u.
Yanvar oyida Rossiya Xavfsizlik kengashi raisi o‘rinbosari Dmitriy Medvedev SSSR davrida bo‘lgani kabi Kuba va Venesuelada Rossiya harbiy bazalarini joylashtirish haqida endi gap bo‘lishi mumkin emasligini ta’kidlagan.
Uning so‘zlariga ko‘ra, bu ikki davlat Rossiyaning hamkorlari bo‘lishi bilan birga “izolyatsiyadan chiqishga hamda ma’lum darajada AQSH bilan normal munosabatlarni tiklashga intilayotgan” suveren davlatlardir.
Izoh (0)