AQSH 7-sentabr kuni so‘nggi bir oy ichida ikkinchi marta Minuteman III qit’alararo ballistik raketasi sinovini o‘tkazadi, bu haqda Pentagon matbuot kotibi Patrik Rayder ma’lum qildi, deb yozadi “RBK”.
AQSH Harbiy-havo kuchlari global zarbdor qo‘mondonligi 7-sentabr kuni erta tongda Kosmik kuchlarning Kaliforniya shtatidagi Vandenberg bazasidan jangovar snaryad o‘rnatilmagan Minuteman III qit’alararo ballistik raketasining sinov parvozini amalga oshiradi”, — dedi u.
Minuteman III — qattiq yonilg‘ili qit’alararo ballistik raketa bo‘lib, 1970-yildan buyon AQSH armiyasi arsenalidan o‘rin olgan. Yer ustidagi nishonlarni yo‘q qilish uchun mo‘ljallangan va zirhli kabellar tizimi orqali yerosti boshqaruv markazi bilan ulangan maxsus kondan uchiriladi.
U sinovni odatiy va oldindan rejalashtirilgan deb atadi, shuningdek, Vashington, xalqaro majburiyatlariga muvofiq, bo‘lg‘usi parvoz haqida Rossiya hukumatini ham ogohlantirganini ma’lum qildi.
Sinov AQSH yadro kuchlari shayligini, yadroviy tiyib turishning samaraliligi va xavfsizligini tekshirish maqsadida o‘tkazilmoqda.
Minuteman III ning bundan avvalgi sinov parvozi 16-avgust kuni Kaliforniyadagi shu bazada amalga oshirilgan edi. Raketaning kallak qismi 6,7 ming km masofani bosib o‘tib, Tinch okeanidagi Marshall orollarida joylashgan Kvajaleyn atolligacha borib yetgandi.
Avgustdagi parvoz oy boshida o‘tkazilishi kerak edi, ammo AQSH Vakillar palatasi spikeri Nensi Pelosining Tayvanga safari fonida Xitoy bilan keskinlik kuchaygani tufayli, u bir necha marta ortga surilgandi.
Izoh (0)