Namanganda viloyat bojxona boshqarmasi va DXX xodimlari kuchli ta’sir qiluvchi dori vositalarining noqonuniy aylanmasiga qarshi tezkor tadbirlar o‘tkazdi. Bu haqda “Daryo” muxbiri Azizbek Abduvaliyev xabar bermoqda.
Namangan shahridagi “Sanoat” mahallasi hududida o‘tkazilgan tezkor tadbir davomida Nexia rusumli avtomobili ko‘zdan kechirildi. Ko‘zdan kechirish davomida ushbu mashinada yo‘lovchi sifatida harakatlanayotgan fuqaroga tegishli karton qutida xorijda ishlab chiqarilgan, muqaddam aylanma yo‘llar orqali Qirg‘izistondan O‘zbekistonga o‘tkazilgan 500 dona flakonda “Tropikamid” hamda 4171 dona “Regapen” nomli kuchli ta’sir qiluvchi dorilari borligi aniqlandi.
Ularning umumiy summasi 185 million so‘mga baholandi.
Shuningdek, Chust tumani “Sadacha” mahallasi hududida o‘tkazilgan navbatdagi tezkor tadbirda Nexia rusumli avtomobil xolislar ishtirokida ko‘zdan kechirilganida avtomashina orqa o‘rindig‘idagi suv isitgich ichiga yashiringan, muqaddam aylanma yo‘llar orqali Qirg‘izistondan noqonuniy ravishda olib kirilgan va hech qanday hujjatlari bo‘lmagan 175 million so‘mlik 486 dona “Tropikamid” va 4144 dona “Regapen” dori vositalari qayta sotish maqsadida olib ketilayotganligi aniqlandi.
Hozirda mazkur holatlar yuzasidan surishtiruv ishlari olib borilmoqda.
Ma’lumot uchun, Namanganda joriy yil 7 oyi davomida bojxona xodimlari tomonidan o‘tkazilgan tadbirlar davomida qiymati 570 million so‘mlik 32086 dona kuchli ta’sir qiluvchi dori vositalarining noqonuniy aylanmasiga chek qo‘yildi.
Mavzuga doir:
Xorazmda reyd: qator dorixonalardan hujjati bo‘lmagan psixotrop dorilar topildi
Toshkentda kuchli ta’sir qiluvchi dori vositalarining muomalaga kiritilishining oldi olindi
Izoh (0)