Britaniya ichki ishlar vaziri Priti Patel hukumat tepasiga Liz Trass kelganidan keyin iste’foga chiqdi. Siyosatchi o‘z qarorini sobiq bosh vazir Boris Jonsonga yo‘llagan maktubida ma’lum qilgan.
Patel yangi hukumatni qo‘llab-quvvatlashini, shuningdek, o‘z vataniga xizmat qilishda davom etishini, lekin buni “orqa o‘rindiqdan” (parlamentning oddiy a’zolari o‘tiradigan joy) amalga oshirishini yozgan.
“Men Liz Trassni yangi rahbar etib saylangani bilan tabriklayman va uni yangi bosh vazir sifatida qo‘llab-quvvatlayman. So‘nggi uch yil davomida ichki ishlar vaziri bo‘lib ishlash men uchun sharaf bo‘ldi. Politsiyani qo‘llab-quvvatlash, immigratsiya tizimimizni isloh qilish va mamlakatimizni himoya qilish borasidagi ishlarimizdan faxrlanaman”, — dedi ichki ishlar vaziri Jonsonga yo‘llagan maktubida.
Priti Patel 2019-yil iyulidan beri ichki ishlar vaziri lavozimida ishlab kelayotgandi. Uni bu lavozimga Boris Jonson tayinlagan.
5-sentabr kuni Liz Trass partiyaviy ovoz berish natijasida hukmron Konservativ partiya yetakchisiga aylandi. Shu bilan birga u Boris Jonsonning o‘rniga Britaniyaning yangi bosh vaziri bo‘ldi.
Izoh (0)