Rossiya nazoratidagi Mariupol manzaralari, Donbassda yong‘inlar. Urushning 194-kunidan fotoreportaj
5-sentabr kuni Vladimir Putin “Rossiyaning xorijdagi gumanitar siyosati” konsepsiyasini tasdiqladi. Uning vazifalaridan biri “rus dunyosi” an’analari va ideallarini himoya qilishdir. Ayni paytda, “Yagona Rossiya” siyosiy partiyasi ishg‘ol ostidagi Mariupolda gumanitar yordam tarqatmoqda, Sankt-Peterburg hokimiyati esa Mariupolda Aleksandr Nevskiyga haykal o‘rnatmoqchi. Vladimir Zelenskiy Ukraina janubi va sharqidagi uchta aholi punkti ozod etilganini e’lon qildi. U aynan qaysi hududlar ekaniga aniqlik kiritmadi, biroq Ukraina bir necha yo‘nalishda qarshi hujum olib borayotganiga shama qildi. Zaporojye AESda stansiyani Ukraina energetika tizimi bilan bog‘lovchi so‘nggi elektr uzatish tarmog‘i o‘chirildi (bu haqda Ukrainaning “Energoatom” agentligi xabar bergan). Meduza urushning 194-kuniga oid asosiy suratlarni e’lon qildi.
Mariupol
Quyida Rossiya nazoratidagi Mariupoldan avgust oyi oxirida olingan suratlar. Bu urush paytida olingan noyob kadrlar bo‘lib, ular yordamida shaharning hozirgi holatini baholash mumkin. Aftidan, Mariupolda fotosuratchilar deyarli yo‘q, u yerda mustaqil matbuot faoliyatiga ruxsat berilganmi yoki yo‘qmi noma’lum.
25-avgust kuni Sankt-Peterburgdagi “Pobeda” fondi yaqin oylarda Mariupolda 29 ta obyektni, jumladan, uchta bog‘cha, uchta maktab, ikkita klinika, onkologiya binosi, bolalar jarrohligi binosi va turar joy binolarini tiklash rejalashtirilayotganini ma’lum qildi. Bundan tashqari, shaharda Aleksandr Nevskiyning badiiy haykali o‘rnatiladi.
“Yagona Rossiya” partiyasiga qarashli markaz Mariupolda oziq-ovqat va gumanitar yordam tarqatmoqda.Foto: Anadolu
Yonida Z belgisi bor buzilgan harbiy texnika.Foto: Anadolu
Mariupoldagi vayron bo‘lgan ko‘chalardan biri. Avgust oyida shaharga kelgan rossiyalik quruvchilar Rossiya Qurilish vazirligi tomonidan tasdiqlangan rejaga muvofiq shikastlangan uylarni buzishni boshladi.Foto: Anadolu
Okkupatsiya qilingan shahar aholisi. 11-avgust kuni shahar meri Vadim Boychenko Rossiya Mariupol aholisini Ukrainaga qarshi urushga safarbar qilayotganini aytdi. Merning so‘zlariga ko‘ra, Mariupolda filtrlash lagerlari hamon ishlamoqda, rus harbiylari esa odamlarni shahardan chiqarmayapti.Foto: Anadolu
Shahar ko‘chalaridan birida avgust oyi oxirida olingan surat. Mart oyi o‘rtalarida o‘qqa tutilib vayron bo‘lgan Drama teatri binosi atrofida endi devor qurish boshlangan – shahar meri maslahatchisi Pyotr Andryushchenko buni isbotlovchi videoni e’lon qildi. Uning fikricha, Rossiya okkupatsion hokimiyati “binoni to‘liq dezinfeksiya qilish va o‘z jinoyat izlarini abadiy yashirish” maqsadida shunday qilmoqda.Foto: Anadolu
Vayron bo‘lgan binolardan biri “snos” qilinmoqda.Foto: Anadolu
Donbass shimoli
Donetsk viloyati, Yenakiyevo shahridagi Peterburg tramvaylari. Leningrad viloyati Yenakiyevoga Shahar kuni munosabati bilan oltita tramvay sovg‘a qildi, deya xabar bermoqda mahalliy OAV. Avvalroq Putinning qaroriga muvofiq Rossiya hududlari DXR va LXRning bosib olingan hududlariga “homiylik” uchun biriktirilgan edi.Foto: “TASS”
Ukrainalik o‘t o‘chiruvchilar turar joy binosida rus qo‘shinlarining zarbasidan keyingi yong‘inni o‘chirmoqda. 6-sentabrga o‘tar kechasi rossiyaliklar Bahmut va Konstantinovkadagi fuqarolik obyektlarini o‘qqa tutdi, deb xabar beradi Ukraina Qurolli kuchlari Bosh shtabi.Foto: Reuters
Yong‘in o‘chirilayotgan paytda ko‘chada turgan bahmutliklar.Foto: Reuters
Severskdagi kasalxona hududida yangi qabrlar. Bu yerda Rossiya hujumlari, o‘qqa tutish va aviazarbalar davom etmoqda.Foto: Instagram
Severskda vayronalar orasida yotgan o‘yinchoq. Surat muallifining aytishicha, shaharda birorta butun bino qolmagan.Foto: Instagram
Seversk aholisi. Ukraina nazoratidagi shaharda ko‘pgina tinch aholi uylarini tark etmagan.Foto: Instagram
Severskda yashovchi kishi. Avgust oyi oxirida Britaniya razvedkasi rossiyaliklarning Donbassdagi hujumlari kuchayishi mumkinligidan ogohlantirdi. Donetskdan shimolda aynan Seversk va Bahmut hududida intensiv janglar davom etmoqda.Foto: Instagram
Slavyanskda portlashdan hosil bo‘lgan o‘ra. Qizil Xochning Ukraina bo‘limi joylashgan bino yaqiniga snaryad tushgan. Ukraina shaharni o‘z nazoratida saqlab qolmoqda.Foto: AP Photo
Tezkor harakatlanish otryadi boshlig‘i Taras Loginov Rossiyaning Slavyanskka navbatdagi zarbasidan keyin Qizil Xochning Ukraina bo‘limi joylashgan bino ichini ko‘zdan kechirmoqda.Foto: AP Photo
Velosipedchi Slavyansk turar joy massivida yerga tiqilib qolgan raketa yonidan o‘tmoqda.Foto: AP Photo
Izoh (0)