Buyuk Britaniyaning yangi bosh vaziri Liz Trass o‘zining iqtisodiy dasturi doirasida inflyatsiya va energetika inqiroziga qarshi kurashish uchun 130 milliard funt sterlinggacha mablag‘ ajratishni rejalashtirmoqda. Bu haqda Bloomberg agentligi tegishli hujjatga tayanib xabar berdi.
Agentlik ma’lumotlariga ko‘ra, Trassning rejasi britaniyalik oddiy oila uchun bir yillik elektr energiyasi va gaz narxini 1971 funt sterling (2300 dollar) yoki undan pastroq qilib belgilashdan iborat. Shu tariqa dasturning umumiy qiymati keyingi 18 oy ichida 130 milliard funt sterlingni tashkil qilishi mumkin.
Eslatib o‘tamiz, Liz Trass 5-sentabr kuni Buyuk Britaniyaning yangi bosh vaziri etib saylandi. Unga Konservatorlar partiyasi a’zolarining 57,4 foizi ovoz berdi, Trassning asosiy raqibi Rishi Sunak esa 42,6 foiz ovoz bilan qo‘llab-quvvatlandi.
Sentabr oyi boshida Trass, agar bosh vazir etib saylansa, u faoliyatining birinchi haftasida elektr energiyasi narxi oshishiga qarshi kurash rejasini taqdim etishini aytgandi. O‘shanda u Britaniya rasmiylari “har kuz va qishda bu holat takrorlanmasligi uchun qiyin qarorlar qabul qilishi zarurligini” ta’kidlagan.
Yevropada energetika inqirozi joriy yil boshidan beri davom etmoqda, yozda u rekord darajadagi jazirama va Rossiyaga qarshi sanksiyalar tufayli kuchaygan. Xususan, Britaniyada elektr energiyasi uchun to‘lovlar rekord darajaga chiqdi. Avgust oyi o‘rtalariga kelib, Buyuk Britaniya aholisining elektr energiyasi uchun qarzi rekord darajadagi 1,3 milliard funt sterlingga yetdi, inflyatsiya esa 40 yil ichida birinchi marta 10,1 foizdan oshdi.
Izoh (0)