Россия Шимолий Кореядан қурол-яроғ сотиб олмоқда — АҚШ разведкаси

Россия Шимолий Кореядан миллионлаб артиллерия снарядлари ҳамда кичик ва ўрта масофали ракеталарни сотиб олмоқда, дея хабар берди The New York Times АҚШ разведкаси ошкор қилган маълумотларга таяниб. Шунга ўхшаш ахборотни америкалик мансабдор CNN’га ҳам маълум қилган.

АҚШ ҳукумати вакиллари етказмалар тафсилотларини ошкор этмади, хусусан, Пхеньян Москвага айнан қандай қурол-яроғларни қандай ҳажмда ва қанча муддатда тақдим этаётганига аниқлик киритмади. Бироқ, аноним америкалик мансабдор сўзларига кўра, Россия келажакда Шимолий Кореядан ҳарбий техника сотиб олиши мумкинлиги ҳам кутилмоқда.

Ҳозирча журналистлар бу ҳақдаги маълумотни мустақил манбалари орқали текшириб кўриш имкониятига эга эмас, деб ёзади The New York Times.

Шимолий Корея техникасини харид қилганлик тўғрисидаги разведка маълумотлари Россия Эроннинг зарбдор учувчисиз учар қурилмаларини сотиб олгани маълум бўлганидан кейин бир ҳафта ўтиб ошкор этилди. Шу билан бирга, The Washington Post манбалари маълумотларига кўра, дастлабки синовлар чоғида Эрон учувчисиз қурилмалари бир неча марта ишдан чиққан, бундан «россияликлар норози бўлган».

The New York Times’нинг америкалик мансабдорлар орасидаги манбалари қайд этишича, Россиянинг Эронга ва Шимолий Кореяга мурожаат қилиш қарори шундан дарак берадики, Ғарб санкциялари унинг Украинада жанг қилаётган Россия армияси учун қурол-яроғ ғамлаб қўйиш имкониятларига таъсир қилмоқда.

Шунингдек, Москва Пекин санкцияларни бузиб, Россия армиясини таъминлашига умид қилган эди, деб ёзади газета. Аммо америкалик мансабдорларга кўра, шу пайтгача Хитой экспорт чекловларига риоя қилиб келган ва Россияга ҳарбий техника ёки уни яратиш учун таркибий қисмларни сотишга уринмаган. Аввалроқ Вашингтон Пекинни Москвага ёрдам бериш қандай оқибатларга олиб келиши мумкинлиги ҳақида огоҳлантирганди.

Америка тадбиркорлик институти ҳарбий эксперти Фредерик Каганнинг сўзларига кўра, Шимолий Кореяга мурожаат қилиш шуни англатадики, Россия, афтидан, ҳатто энг оддий ҳарбий техникани ҳам ўзи мустақил ишлаб чиқариш имкониятига эга эмас.

«Кремль Шимолий Кореядан ёки яна кимдандир артиллерия снарядлари ва ракеталарни сотиб олишининг ягона сабаби шуки, Путин Россия иқтисодиётини уруш учун ҳатто энг оддий даражада сафарбар этишни ҳам хоҳламайди ёки бундай қила олмайди», — деб фикр билдирди Каган.

«Шимолий Кореядан умуман нимадир сотиб олишга тўғри келаётганидан Кремль ташвишга тушиши керак», — деди Уруш тадқиқотлари институтининг Россия бўйича экспертлар гуруҳи раҳбари Мэйсон Кларк.

The New York Times қайд этишича, Эрон ва Шимолий Корея томонидан қурол-яроғ етказиб берилаётгани Россиянинг ўз қурол-яроғ захиралари тугаб битганидан дарак бериши мумкин.