Germaniyaning Leypsig shahrida minglab odamlar energiya narxi oshishiga qarshi ko‘chaga chiqdi. Mahalliy Volksstimme portaliga ko‘ra, xuddi shunday miting Magdeburgda ham bo‘lib o‘tdi. Avvalroq Kyoln aholisi shunday talablar bilan aksiyaga chiqqandi.
OAV xabarlariga ko‘ra, 5-sentabrdagi namoyishlarni bir necha partiya va alyanslar, jumladan, so‘lchi Die Linke va o‘ta o‘ngchi Frei Saksen ittifoqi uyushtirgan. Kuzatuvchilarning hisob-kitoblariga ko‘ra, Leypsigdagi mitingda 2000 dan ortiq odam qatnashgan.
“Svetofor” koalitsiyasi (Sotsial-demokratik partiya, Yashillar va Erkin Demokratik partiyadan iborat) fuqarolarga inqirozdan chiqishda yordam berish uchun 65 milliard yevrolik yordam paketini e’lon qilgandi. Biroq namoyishchilar bu yetarli emas, deb hisoblamoqda.
Magdeburg aholisi Rossiyaga qarshi sanksiyalarni bekor qilish va “Shimoliy oqim 2” quvurini ishga tushirishni qo‘llab-quvvatladi. Politsiya ma’lumotlariga ko‘ra, Sobor maydonida 2000 ga yaqin namoyishchi to‘plangan. O‘ta o‘ngchi “Germaniya uchun muqobil” partiyasining parlament guruhi rahbari Oliver Kirshner gaz narxining yuqoriligidan norozilik bildirib, Rossiyadan energiya import qilish hajmini oshirishga chaqirdi.
“Shimoliy oqim 2 ni ochib yuboring, aqldan ozganlar”, — deya hayqirdi u nutqi davomida.
Eslatib o‘tamiz, yonilg‘i va oziq-ovqat narxi oshishiga qarshi namoyishlar Yevropaning bir qancha davlatlarida allaqachon o‘tkazilgan. 3-sentabr kuni Chexiya poytaxti Pragada hukumatga qarshi namoyishga 70 ming kishi chiqdi. Aksiya “Birinchi navbatda Chexiya” shiori ostida o‘tkazildi, namoyishchilar rasmiylardan Ukrainadagi mojaro bo‘yicha betaraflik pozitsiyasini egallashni talab qildi.
2-sentabr kuni Rossiyaning ”Gazpromi” “Shimoliy oqim” gaz quvurini noma’lum muddatga butunlay to‘xtatib qo‘ydi, u Rossiya Ukrainaga bostirib kirganidan keyin Yevropaga gaz yetkazib berish uchun asosiy quvurga aylanib qolgan edi. Gaz quvuri “Shimoliy oqim”ning ishlab turgan yagona turbinasida aniqlangan nosozliklar bartaraf etilguniga qadar ishlamaydi. 2022-yil yozida “Gazprom” turli bahonalar bilan “Shimoliy oqim” orqali yetkazib berish hajmini kamaytirgandi: 15-iyul kuni gaz yetkazish rejali ko‘rsatkichning 60 foizigacha, sal keyinroq esa 20 foizigacha qisqartirildi.
Izoh (0)