Ukrainaning Qozog‘istondagi elchisi ruslarni o‘ldirish haqidagi gapi uchun uzr so‘radi va ta’tilga chiqdi

Ukrainaning Qozog‘istondagi elchisi Pyotr Vrublyovskiy ruslarni o‘ldirish haqida aytgan so‘zlari uchun uzr so‘radi. Bu haqda Qozog‘iston tashqi ishlar vazirligi matbuot kotibi Aybek Smadiyarovga tayanib, “Interfaks” xabar berdi.

“Xabaringiz bor, Ukraina elchisini vazirlikka taklif qilgandik, u uzr so‘radi va bunday gaplarni uyiga ketish oldidan kuchli hissiyotga berilib gapirganini aytdi”, — dedi Smadiyarov 5-sentabr kuni bo‘lib o‘tgan brifingda.

Smadiyarov hozir Vrublyovskiy ta’tilda ekanini qo‘shimcha qildi.

Avgust oyida Pyotr Vrublyovskiy qozog‘istonlik bloger Dias Kuzairovga bergan intervyusida imkon qadar ko‘proq ruslarni o‘ldirish zarurligi haqida gapirgan: “Hozir ruslarni qancha ko‘p o‘ldirsak, farzandlarimizning ular qo‘lida o‘lishi shuncha kamayadi”.

Ushbu gaplar katta rezonansga sabab bo‘ldi. Qozog‘iston xalqi assambleyasi Vrublyovskiyning bayonotlarini qoraladi. Elchi Qozog‘iston TIVga chaqirildi.