Rossiya prezidenti Vladimir Putin Primorye o‘lkasidagi Sergeyevskiy poligoniga keldi, deb yozadi “RBK” davlat rahbarining matbuot kotibi Dmitriy Peskovga tayanib. U yerda “Vostok-2022” harbiy o‘quv mashg‘ulotlarining yakuniy qismi bo‘lib o‘tmoqda.
Poligonda mudofaa vaziri Sergey Shoygu va Qurolli kuchlar Bosh shtabi rahbari Valeriy Gerasimov bo‘lib turibdi. “Hozir yopiq majlis bo‘lib o‘tmoqda. Yig‘ilish tugaganidan keyin prezident, oliy bosh qo‘mondon o‘quv mashqlarining yakuniy bosqichini kuzatish imkoniyatiga ega bo‘lishi kutilmoqda”, — dedi Peskov.
“Vostok-2022” harbiy mashqlari 1-sentabrdan 7-sentabrgacha bo‘lib o‘tadi, ularga Gerasimov rahbarlik qilmoqda. Manyovrlar Sharqiy harbiy okrugning yettita poligonida, shuningdek, Oxota va Yapon dengizlari akvatoriyalari va qirg‘oqbo‘yi zonalarida olib borilmoqda. Mashg‘ulotlarda Xitoy, Belarus, Hindiston va Qozog‘iston kabi 14 ta mamlakatdan 50 mingdan ziyod harbiy xizmatchilar va 5 mingdan ortiq texnika qatnashmoqda.
Harbiy mashqlar haqida Rossiya Mudofaa vazirligi iyul oxirida e’lon qilgandi, shundan keyin Yaponiya Janubiy Kuril orollarini harbiy mashg‘ulotlar o‘tkazish zonasidan chiqarishni talab qildi. TIV o‘shanda Yaponiya tomoniga orollar Rossiyaning ajralmas qismi ekanini eslatdi.
AQSH Davlat departamenti “Vostok-2022” o‘quv mashqlari rejali tarzda o‘tkazilayotgani va ularda qatnashayotgan suveren mamlakatlar tegishli huquqqa ega ekanini ma’lum qildi.
Izoh (0)