Хитойнинг электроника ишлаб чиқарувчи Huawei компанияси ўз ходимларининг бир қисмини Россиядан Ўзбекистон ва Қозоғистонга ўтказди. Бу ҳақда «Ведемости» нашрига таяниб Forbes хабар бермоқда. Huawei матбуот хизмати ходимларининг Россиядан кўчирилиши ҳақидаги маълумотга изоҳ бермаган.
Хитой компанияси россиялик ходимларини Ўзбекистон ва Қозоғистонда ишлаши учун 2022 йил баҳоридан қайта тақсимлашни бошлаган.
Маълум бўлишича, ходимларнинг бир қисми Хитойдан келган Huawei бўлинмаларининг менежерлари ва раҳбарларидир.
Улар йил бошида Россияга жўнатилган, бироқ кейинчалик МДҲнинг бошқа мамлакатларига йўналтирилган.
Баъзи россиялик менежерлар ҳам узоқ хизмат сафарларига юборилади. Telecom Daily таҳлилий агентлиги бош директори Денис Кусковнинг сўзларига кўра, улар асосан Қозоғистонга кўчиб ўтиши кутилмоқда.
Компания ходимларини июль—август ойларида кўчиришни бошлади, Қозоғистон эса барча МДҲ мамлакатлари орасидан танланди. Бу бозор Huawei учун минтақадаги энг йирик ва истиқболлидир, — деди Кусков.Унинг сўзларига кўра, Қозоғистонга ўтказилган ходимлар компания бизнесининг нафақат ушбу давлат, балки МДҲнинг барча мамлакатларида ривожланиши учун жавобгар бўлади.
Баҳорда бир қатор йирик сотувчилар, смартфонлар ва бошқа телекоммуникация ускуналари ишлаб чиқарувчилари Россиядаги фаолиятини тўхтатилишини ёки Россия бозоридан чиқишини эълон қилди.
Huawei Россияда фаолиятини давом эттириш ёки кетиш ҳақида расмий баёнот бермади. Август ойи бошида Хитой компанияси ўзининг Вмалл бозорида сотувлар тўхтатилганини эълон қилди, бироқ мижозларга берилган буюртмаларни етказиб беришга ва аллақачон қилинган харидлар бўйича кафолат хизматини сақлаб қолишга ваъда берди.
Глобал миқёсда Huawei’нинг 2022 йилнинг биринчи ярмидаги соф фойдаси 52 фоизга камайиб, 15,1 миллиард юанни (2,2 миллиард доллар) ташкил қилди.
Изоҳ (0)