Yevropada iste’mol narxlari avgust oyida yillik hisobda 9,1 foizga o‘sdi. Bu haqda Yevropa Ittifoqi statistika boshqarmasining dastlabki ma’lumotlariga tayanib Bloomberg xabar bermoqda.
Shunday qilib, inflyatsiya iyul oyidagi 8,9 foizga nisbatan tezlashdi va hisob-kitoblar boshlanganidan beri maksimal darajada yangilandi.
Ayni paytda inflyatsiya Yevropa Markaziy bankining 2 foizlik ko‘rsatkichidan to‘rt baravar yuqori bo‘lib turibdi.
Oziq-ovqat va energiyadan tashqari iste’mol narxlari avgust oyida o‘tgan oydagi 4 foizga nisbatan yillik hisobda 4,3 foizga oshdi.
Energiya resurslari o‘tgan yilning avgustiga nisbatan 38,3 foizga qimmatlashdi, biroq o‘sish sur’ati bir oy oldingi 39,6 foizga nisbatan bir oz sekinlashdi.
Oziq-ovqat, alkogol va tamaki mahsulotlari 10,6 foizga (iyulda 9,8 foizga), sanoat mahsulotlari 5 foizga (4,5 foizga), xizmatlar 3,8 foizga (3,7 foizga) qimmatlashdi.
Avgust oyida iste’mol narxlarining o‘sishi o‘tgan oyga nisbatan 0,5 foizni tashkil etdi. Iyul oyida bu ko‘rsatkich 0,1 foizga oshgan.
Iqtisodchilar kelgusi chorakda yevrohududda retsessiya bo‘lishi ehtimolini tobora ko‘proq prognoz qilmoqda, chunki yashash narxining ko‘tarilishi pandemiyadan endi qayta tiklanayotgan iqtisodlarga putur yetkazmoqda.
Hukumatlar soliqlarni kamaytirish, uy xo‘jaliklariga to‘g‘ridan-to‘g‘ri to‘lovlar va kompaniyalar uchun subsidiyalar kabi ko‘plab chora-tadbirlar orqali energiya narxining zarbasini qoplashga harakat qilmoqda. Bu maqsadlar uchun Yevropa Ittfioqi 280 mlrd yevro sarflagan.
Izoh (0)