Вьетнам жорий йилнинг саккиз ойида жаҳон бозорига гуруч экспортини 19 фоизга ошириб, 4,7 миллион тоннагача етказди. Бу ҳақда «Tuoi Tre» мамлакат озиқ-овқат ишлаб чиқарувчилар уюшмасига таяниб хабар берди.
Ташкилот маълумотларига кўра, йил охирига қадар Вьетнам гуручини хорижга етказиб бериш ҳажми 6,3—6,5 миллион тоннагача ошиши кутилмоқда, бу эса ушбу маҳсулотга ташқи бозорларда талабнинг юқорилиги билан боғлиқ.
Мутахассисларнинг прогнозларига кўра, Вьетнам гуручининг экспорт нархлари ҳам келгуси ойларда ишлаб чиқариш харажатларининг ошиши ва гуруч етиштирувчи бир қатор йирик мамлакатларда ноқулай об-ҳаво шароитида бўлган ёмон ҳосил туфайли ошади.
Маҳаллий Қишлоқ хўжалиги вазирлиги маълумотларига кўра, мамлакатда ҳозирда 7,3 миллион гектарда 26—28 миллион тонна шоли етиштирилади.
Бу миқдор мамлакатнинг озиқ-овқат хавфсизлигини таъминлаш ва 6—7 миллион тонна экспорт қилиш учун етарли.
Мавзуга доир: Глобал озиқ-овқат инқирозига сабаб: Ҳиндистон гуруч экспортини чекламоқчи
Ҳиндистонда кузатилаётган қурғоқчилик оқибатида гуруч экспортининг чекланиши мумкинлиги ҳақида хабар берилган эди. Жаҳон бозорига гуруч етказиб беришдаги энг йирик давлатнинг ушбу эҳтимолий қарори глобал очарчилик хавфи юзага келтирди. Вьетнам экспорти буни олдини олиши кутилмоқда.
Ветнам экспортининг асосини агросаноат мажмуаси маҳсулотлари ташкил этади. Унинг ассортиментида гуруч, қаҳва, чой, зираворлар ва денгиз маҳсулотлари устунлик қилади.
Мамлакат узоқ вақтдан бери қора мурч экспорти бўйича жаҳон етакчилигини сақлаб, кажу ёнғоқлари ва ундан тайёрланган маҳсулотларнинг дунёдаги энг йирик экспортчиси бўлиб қолмоқда.
Вьетнам, шунингдек, Ҳиндистон ва Таиланддан кейин дунёдаги учинчи йирик гуруч экспортчиси ва халқаро бозорга Бразилиядан кейин иккинчи йирик кофе етказиб берувчи ҳисобланади.
Аввалроқ ўғит нархларининг баландлиги сабаб Осиёда гуруч ҳосили хавф остидалиги ҳақида хабар берилганди.
Изоҳ (0)