Inflyatsiya rekord darajaga yetgan vaqtda Rossiya Yevropaga gaz yetkazib berishni keskin qisqartirdi

Rossiya Yevropaga tabiiy gaz yetkazib berishni vaqtincha to‘xtatdi va Fransiya kommunal xizmatiga barcha yetkazib berishni to‘xtatdi. Bu esa mintaqadagi inflyatsiyani rekord darajadagi 9 foizga yetkazgan energetika inqirozini chuqurlashtirdi, deb yozmoqda CNN.

Rossiya davlat energetika giganti “Gazprom” 31-avgustda “Shimoliy oqim 1” quvuri orqali barcha eksportni to‘xtatdi. Bunga esa ta’mirlash ishlarini sabab qilib ko‘rsatdi. U 3 kun davom etadi.

“Shimoliy oqim 1” Rossiyaning qit’aga ulkan gaz yetkazib beruvchi asosiy arteriyasi hisoblanadi. Bu quvur o‘tgan yili Yevropa umumiy Rossiya gaz importining qariyb 35 foizini tashkil qilib, to‘g‘ridan to‘g‘ri YIning eng yirik iqtisodiyoti bo‘lgan Germaniyaga oqib kelgan.

So‘nggi oylarda “Gazprom” “Shimoliy oqim 1” orqali oqim hajmini 20 foizga qisqartirdi, bunga texnik xizmat ko‘rsatish bilan bog‘liq muammolar sabab bo‘ldi va g‘arb sanksiyalarini Ukrainadagi urushga javoban texnologiya eksporti bilan bog‘ladi.

Shartnomalarda ko‘rsatilgan yevro yoki dollarda emas, balki gazga rublda to‘lashdan bosh tortgani uchun Rossiya bir qancha “do'stona bo‘lmagan” Yevropa davlatlari va energetika kompaniyalariga yetkazib berishni ham to'xtatdi.

Fransiyalik Engie eng so'nggi qurbondir. 30-avgustda “Gazprom” iyul oyida yetkazib bergan gaz uchun kompaniyadan to‘liq to‘lov olmaganini da’vo qilib, 1-sentabrdan boshlab Engie’ga yetkazib berishni butunlay to‘xtatib qo‘yishini bildirdi.

Yevropa Ittifoqi statistika idorasi 31-avgustda e’lon qilgan dastlabki hisob-kitoblarga ko‘ra, avgust oyida yevrodan foydalanadigan 19 mamlakatda inflyatsiya 9,1 foizni tashkil etdi. Bu YI 1997-yilda qaydlarni yurita boshlaganidan beri eng yuqori ko‘rsatkichdir.

Energiya narxlari inflyatsiyaning yagona asosiy omili bo'lib, yil davomida — avgustgacha 38 foizga o‘sdi.

Yevropa Ittifoqi mamlakatlari noyabr oyigacha gaz omborlarini kamida 80 foiz quvvatiga to‘ldirish maqsadiga erishdi.

Germaniya kansleri Olaf Sholz uning mamlakati joriy qish mavsumiga gaz ta’minotini amalga oshirish borasida “bir necha oy oldin kutilganidan ko‘ra ancha yaxshi tayyorlanganini” aytdi.