“Tolibon” Afg‘onistondan xorijiy qo‘shinlar to‘liq olib chiqilgan kunni mamlakat miqyosida dam olish kuni etib belgiladi. Bu haqda Khaama axborot agentligi xabar bermoqda.
Eslatib o‘tamiz, 2021-yil 31-avgust kuni AQSH armiyasining so‘nggi bo‘linmalari Afg‘onistondan olib chiqilgan edi. Shu tariqa mamlakatda 2001-yildan-2021 yilgacha davom etgan NATO davlatlarining harbiy missiyasiga yakun yasaldi.
Yigirma yil davomida xorijiy qo‘shinlar Afg‘onistonda toliblar va boshqa terrorchi guruhlarga qarshi kurashgan.
2020-yil fevral oyida AQSH “Tolibon” bilan tinchlik bitimi tuzishga kelishib oldi. Shundan keyin Afg‘onistonda Amerika kontingenti asta-sekin qisqartirildi. Xorijiy qo‘shinlarni olib chiqishning yakuniy bosqichi “Tolibon” 15-avgustdan 16-avgustga o‘tar kechasi Kobulni qarshiliksiz egallab olganidan so‘ng amalga oshirildi.
31-avgust kuni xorijiy qo‘shinlarni evakuatsiya qilish va olib chiqish yakunlandi. Amerikaning so‘nggi samolyotida Kobuldagi AQSH qo‘shinlari qo‘mondoni Kris Donaxyu va AQSHning Afg‘onistondagi elchisi Ross Uilson Afg‘oniston poytaxtini tark etdi.