«Толибон» Афғонистондан хорижий қўшинлар тўлиқ олиб чиқилган кунни мамлакат миқёсида дам олиш куни этиб белгилади. Бу ҳақда Khaama ахборот агентлиги хабар бермоқда.
Эслатиб ўтамиз, 2021 йил 31 август куни АҚШ армиясининг сўнгги бўлинмалари Афғонистондан олиб чиқилган эди. Шу тариқа мамлакатда 2001 йилдан-2021 йилгача давом этган НАТО давлатларининг ҳарбий миссиясига якун ясалди.
Йигирма йил давомида хорижий қўшинлар Афғонистонда толиблар ва бошқа террорчи гуруҳларга қарши курашган.
2020 йил февраль ойида АҚШ «Толибон» билан тинчлик битими тузишга келишиб олди. Шундан кейин Афғонистонда Америка контингенти аста-секин қисқартирилди. Хорижий қўшинларни олиб чиқишнинг якуний босқичи «Толибон» 15 августдан 16 августга ўтар кечаси Кобулни қаршиликсиз эгаллаб олганидан сўнг амалга оширилди.
31 август куни хорижий қўшинларни эвакуация қилиш ва олиб чиқиш якунланди. Американинг сўнгги самолётида Кобулдаги АҚШ қўшинлари қўмондони Крис Донахю ва АҚШнинг Афғонистондаги элчиси Росс Уилсон Афғонистон пойтахтини тарк этди.
Изоҳ (0)