Oq uy Erondan Rossiyaga dronlar yetkazib berilganini tasdiqladi

AQSH Eronning Rossiyaga dronlar yetkazib berganini rasman tasdiqladi. Bu haqda Oq uy saytida ma’lum qilingan.

Oq uy matbuot kotibi Karin Jan-Pyer brifingda Rossiya avgust oyida Erondan Mohajer 6 va Shahed seriyali dronlarini olganini aytdi.

“Bizdagi ma’lumotlarga ko‘ra, Rossiya avgust oyida bir necha kun davomida Erondan Mohajer 6 va Shahed seriyali dronlarini olgan. Rossiya transport samolyotlariga Erondagi aerodromda dronlar yuklangan, so‘ng ular Erondan Rossiyaga uchib ketgan. Biz buni ko‘rib turibmiz, bahomiz shunday”, — dedi Jan-Pyer.

Urushni o‘rganish bo‘yicha Amerika instituti (ISW) tahlilchilari ham Eron Su-35 rus harbiy samolyotlarini olish umidida Rossiyaga dronlarning birinchi partiyasini yuborgan bo‘lishi mumkinligi haqida hisobot e’lon qilgandi.

The Washington Post gazetasi Amerika razvedkasidagi manbalariga ko‘ra, 19-avgust kuni Rossiya yuk samolyotlari Erondan Mohajer-6 va Shahed dronlarini olib ketgani haqida xabar bergan.

Avval Tehron Moskvaga dronlar yetkazib berilishini rad etib, bunday xabarlarni asossiz deb atagandi. Kreml esa bu mavzuga izoh berishdan bosh tortgan.