Iqtisodiy tadqiqotlar va islohotlar markazi 2022-yil uchun YIM prognozlarini hisoblab chiqdi. Bu haqda markaz matbuot xizmati “Daryo”ga ma’lum qildi.
O‘zbekiston iqtisodiyotiga salbiy tashqi shoklar sezilarli ta’sir ko‘rsatmoqda. Prognozlar yalpi ichki mahsulotning chorak yakunlari ko‘rsatkichlarida aniqlanmagan o‘ziga xos jihatlarini ochib berdi.
Xususan, sezilarli pasayish joriy yilning fevral—mart oylarida kuzatildi. Ammo O‘zbekiston iqtisodiyoti 2-chorak davomida sezilarli darajada tiklanib yuqori sur’atlarda o‘sdi.
O‘zbekistonning birinchi chorakdagi iqtisodiy o‘sishi odatda mavsumiy omillar hisobiga past bo‘ladi. 2018—2021 yillar davomida O‘zbekiston YIMning o‘sishi birinchi chorakda yalpi ichki mahsulotning yillik o‘sishidan o‘rtacha 0,43 foizga kam bo‘ldi.
Shu sababli salbiy omillarning iqtisodiyotga ta’siri kuchli bo‘ldi va 2022-yilning birinchi choragida YIM o‘sishini sekinlashtirdi.
Shuningdek, YIM dinamikasining haftalik prognoz ko‘rsatkichlarini jamlagan holda, 2022-yil 1-yarmida o‘tgan yilning shu davriga nisbatan iqtisodiy o‘sishning taxminiy ko‘rsatkichlari 4,99 foizni tashkil qildi.
2022-yilning 3-choragida YIMning taxminiy haftalik dinamikasida o‘sib borayotgan tendensiya kuzatilmoqda, bu esa o‘sish sur’atini yiliga kamida 0,68 foizga oshiradi. Bunga ko‘ra, 2022-yil uchun YIMning real o‘sish surati 5,77 foiz darajasida prognoz qilinmoqda.
Shundan kelib chiqib, 2022-yil uchun O‘zbekistonning iqtisodiy o‘sishi prognoz qilinayotgan diapazoni 5,67—5,87 foiz darajasida belgilandi.
Izoh (0)