O‘zbekistonda bir oy ichida bodring narxi ikki baravarga oshdi

Oxirgi oy davomida O‘zbekistonda silliq kalta bodringning ulgurji narxlari dinamikasida barqaror o‘sish tendensiyasi kuzatildi, narxlar 2,3 barobar oshdi. Bu haqda EastFruit xabar bermoqda.

Bundan tashqari, joriy ulgurji narxlar o‘tgan yilgi darajadan 1,8 baravar yuqori bo‘lmoqda.

Joriy yilning yoz boshidan O‘zbekistonda silliq kalta bodringning minimal ulgurji narxlari 2022-yil 22-iyulda bir kilogramm uchun 2 500 so‘m darajasida qayd etilgan. 

O‘rtacha ulgurji narxi 3 000 so‘mni tashkil etgan va shundan beri barqaror o‘sish tendensiyasi shakllandi. 

2022-yil 22-iyuldan 26-avgustgacha bo‘lgan davrda ushbu mahsulotlarning o‘rtacha ulgurji narxlari bir kilogramm uchun 3 000 so‘mdan 7000 so‘mgacha oshdi. Bir oy ichida 2,3 barobar.

E’tiborlisi, o‘tgan yilning 22-iyulida silliq kalta bodringning o‘rtacha ulgurji narxi ham 3 000 so‘m darajasida bo‘lgan va 2021-yil 22-iyuldan 26-avgustgacha bo‘lgan davrda o‘rtacha ulgurji narxlar 4 000 so‘mgacha o‘sgan. Biroq bu yilgi o‘sish sur’ati o‘tgan yilgi ko‘rsatkichdan ancha balandaroq bo‘ldi.

Shunday qilib, 2022-yil 26-avgust holatiga ko‘ra, ushbu mahsulotlarning o‘rtacha ulgurji narxi o‘tgan yilning shu sanasida qayd etilgan darajadan 1,8 baravar yuqori.

Taqqoslash uchun, qo‘shni Tojikistonda ushbu mahsulotlarning o‘rtacha ulgurji narxlari O‘zbekistonnikidan 2 barobar, Polshada esa 1,5 barobar past.