Иқтисодий тадқиқотлар ва ислоҳотлар маркази 2022 йил учун ЯИМ прогнозларини ҳисоблаб чиқди. Бу ҳақда марказ матбуот хизмати «Дарё»га маълум қилди.
Ўзбекистон иқтисодиётига салбий ташқи шоклар сезиларли таъсир кўрсатмоқда. Прогнозлар ялпи ички маҳсулотнинг чорак якунлари кўрсаткичларида аниқланмаган ўзига хос жиҳатларини очиб берди.
Хусусан, сезиларли пасайиш жорий йилнинг февраль—март ойларида кузатилди. Аммо Ўзбекистон иқтисодиёти 2-чорак давомида сезиларли даражада тикланиб юқори суръатларда ўсди.
Ўзбекистоннинг биринчи чоракдаги иқтисодий ўсиши одатда мавсумий омиллар ҳисобига паст бўлади. 2018—2021 йиллар давомида Ўзбекистон ЯИМнинг ўсиши биринчи чоракда ялпи ички маҳсулотнинг йиллик ўсишидан ўртача 0,43 фоизга кам бўлди.
Шу сабабли салбий омилларнинг иқтисодиётга таъсири кучли бўлди ва 2022 йилнинг биринчи чорагида ЯИМ ўсишини секинлаштирди.
Шунингдек, ЯИМ динамикасининг ҳафталик прогноз кўрсаткичларини жамлаган ҳолда, 2022 йил 1-ярмида ўтган йилнинг шу даврига нисбатан иқтисодий ўсишнинг тахминий кўрсаткичлари 4,99 фоизни ташкил қилди.
2022 йилнинг 3-чорагида ЯИМнинг тахминий ҳафталик динамикасида ўсиб бораётган тенденция кузатилмоқда, бу эса ўсиш суръатини йилига камида 0,68 фоизга оширади. Бунга кўра, 2022 йил учун ЯИМнинг реал ўсиш сурати 5,77 фоиз даражасида прогноз қилинмоқда.
Шундан келиб чиқиб, 2022 йил учун Ўзбекистоннинг иқтисодий ўсиши прогноз қилинаётган диапазони 5,67—5,87 фоиз даражасида белгиланди.
Изоҳ (0)