Prognozlashtirish va makroiqtisodiy tadqiqotlar instituti (PMTI) ekspertlari O‘zbekiston hududlarida Iqtisodiy faollik barometri (IFB) natijalarini e’lon qildi.
IFB ma’lum bir davrda hududdagi iqtisodiy faollikni baholaydi. Faollikni pasayishini bartaraf etish bo‘yicha choralar ko‘rish hamda hududlar o‘rtasida raqobatni rag‘batlantiradi. IFB 12 ta ko‘rsatkichni 3 ta komponentga bo‘lgan (ishlab chiqarish, tadbirkorlik, tashqi savdo faolligi) holda hisoblanadi.
Tahlil natijalariga ko‘ra, 2022-yilning birinchi yarmida iqtisodiy faollikning yuqori ko‘rsatkichlari Andijon, Jizzax, Samarqand viloyatlarida hamda Toshkent shahrida (IFB = 0,569-0,678) kuzatilgan.
Bunga Andijon va Jizzax viloyatlarida iste’mol tovarlarni ishlab chiqarishda, tovar va xizmatlar eksporti hamda importida kuzatilgan jadal o‘sish ijobiy ta’sir etgan. O‘z navbatida, bu viloyatlarda ishlab chiqarish va tashqi savdo ham faol bo‘lgan.
Buning natijasida Andijon (12-o‘rindan 1-o‘ringa) va Jizzax (9-o‘rindan 2-o‘ringa) viloyatlari hududlar orasida o‘z pozitsiyalarini yaxshilashga erishishdi.
Samarqand viloyatining IFB yuqoriligi (3-o‘rin) ushbu hududda tadbirkorlik faoliyati (kichik biznes subyektlarining tashkil etish va samarali faoliyat yuritish qulayligi) va eksport salohiyati (oziq-ovqat mahsulotlari, turizm xizmatlari) rivojlanganligi natijasida kuzatildi.
Hisobot davrida 6 ta hudud (Andijon, Jizzax, Navoiy, Farg’ona, Xorazm, Samarqand viloyatlari) iqtisodiy faolligini yaxshilagan bo‘lib, bunda tadbirkorlik iqtisodiy rivojlanishni yuzaga keltiruvchi asosiy omil hisoblanadi.
Avvalroq O‘zbekistonda eng ko‘p ulgurji savdo amalga oshirilgan hududlar ma’lum qilingan edi.
/> Surat: PMTI
Izoh (0)